Флоренс Гриффит-Жойнер

Чөлөөт нэвтэрхий толь — Википедиагаас
Харайх: Удирдах, Хайлт
Флоренс Гриффит-Жойнер
Florence Griffith Joyner.jpg

АНУ-ын ерөнхийлөгч агсан Рональд Рейганы хамт. 1988 он

Хөнгөн атлетик
Төлөөлдөг улс: Америк Америк
Хувийн мэдээлэл
Бүтэн нэр Флоренс Гриффит-Жойнер
Төрсөн огноо 1959 оны 12 сарын 21
Төрсөн газар АНУ, Калифорни муж улс, Лос-Анжелес
Нас барсан огноо 1998 оны 9 сарын 21
Нас барсан газар Калифорни муж улс, Мишн Виежо
 
Медалиуд
Зуны олимп
Мөнгө Лос-Анжелесийн олимп 200м
Алт Сөүлийн олимп 100м
Алт Сөүлийн олимп 200м
Алт Сөүлийн олимп 4*100м буухиа
Мөнгө Сөүлийн олимп 4*400м буухиа
Дэлхийн АШТ
Алт Ром 1987 4*100м буухиа
Мөнгө Ром 1987 200м

Флоренс Гриффит-Жойнер (англ. Florence Griffith-Joyner, төрөхдөө Флоренс Делорес Гриффит, англ. Florence Delorez Griffith) гэдэг нэртэй байсан[1]) (1959 оны 12 сарын 21 - 1998 оны 9 сарын 21) нь Фло-Жо гэдэг хочоороо алдаршсан Америкийн Нэгдсэн Улсын хөнгөн атлетикийн тамирчин байв.

Тэрээр Лос-Анжелес хотод төрж, Жордан Даунс дахь нийтийн байранд өсч торнижээ. Гриффит-Жойнер нь 1980-аад оны сүүлчээр дэлхийн хөнгөн атлетикийн тайзнаа тод гялалзсан од байсан бөгөөд 100м, 200м-ийн зайн гүйлтийн төрөлд дэлхийн дээд амжилтыг шинэчлэн тогтоож байсан бөгөөд 100м-ийн дээд амжилт нь одоо болтол эвдэгдээгүй байгаа билээ. Түүний нөхөр нь алдартай хөнгөн атлетикч Ал Жойнер, нөхрийн нь дүү нь олимпийн 3 алтан медальт Жэки Жойнер-Керси юм.

Амжилт[засварлах]

Гриффит 1983 онд зохиогдсон анхны дэлхийн аварга шалгаруулах тэмцээнд оролцож, 200м-н төрөлд 4-р байранд орсноор дэлхийн тавцан дахь гараагаа эхэлсэн. Ирэх жил нь төрөлх Лос-Анжелест нь олимпийн наадам болоход 200м-н төрөлд мөнгөн медаль авснаасаа илүүтэйгээр, урт ургуулж будсан хумсаараа хүмүүсийн анхаарлыг татаж байв. 1985 онд Гран Пригийн шувтаргын 100м-н гүйлтэд 11.00 секундын амжилт үзүүлэв. Түүний дараа нэг хэсэг бэлтгэл хийхээ багасгасан Гриффит 1984 оны олимпийн гурвын харайлтын аварга Ал Жойнертэй 1987 онд хуримласан байна.

1987 онд ДАШТ-д буцаж ирэхдээ 200м-н гүйлтэд ахиад л мөнгөн медаль хүртсэн байна. Амжилтын оргил нь 1988 онд тохиов. АНУ-ын олимпийн сонгон шалгаруулалтын хагас шигшээд 200м-н зайд мэргэшсэн Гриффит 100м-н зайд 10.49 секундын амжилт үзүүлэн дэлхийн дээд амжилтыг шинэчилсэн нь бүх хүнийг гайхуулав. Албан ёсны протоколд тухайн үеийн салхины хурд 0.0 м/сек байсан гэж тэмдэглэгдсэн байдаг ч зарим эх сурвалжид салхины тусламжтай тогтоосон байж магадгүй гэж үздэг бөгөөд тэмцээний бусад төрлийн уралдаан явагдах үед салхины хурд 7 м/сек хүртэл байсан гэдэг. 1997 оноос Олон Улсын Хөнгөн Атлетикийн Холбооны Хөнгөн атлетикийн статистикчдын хурлаар түүний амжилтыг "Хүчтэй салхины тусламж орсон байж магадгүй, гэхдээ дэлхийн дээд амжилтаар бүртгэгдсэн" гэж бичих болжээ[2]. Гэхдээ түүний энэ амжилтыг тооцохгүй байсан ч дараагийн үзүүлсэн амжилт болох 10.61 секунд нь тухайн үеийн дэлхийн дээд амжилт болох байв.

1988 оны Сөүлийн олимпод Фло-Жо хэмээх нэр тодоор цуурайтсан билээ. 100м-ийн гүйлтийн шувтаргад салхины хүчийг оруулаад 10.54 секундын амжилт үзүүлж түрүүлсэн нь мөнгөн медаль авсан Эвелин Ашфордоос 0.3 секундээр илүү байлаа. 200м-н бага шөвөгт дэлхийн дээд амжилтыг эвдэж, улмаар шигшээ уралдаанд 21.34 секундын амжилтаар дахин түүнийгээ шинэчилж тогтоосон байна. Тэрээр мөн АНУ-ын багт багтаж 4 x 100м, 4 x 400м-ийн буухиа уралдаанд хурд сорьж, алт, мөнгөн медаль хүртсэн бөгөөд 4 x 100м-ийн буухиад анх удаа уралдсан нь тэр байлаа. Түүний 100м-т алтан медаль авсан хором нь 2002 онд Британийн 4-р сувгаас шалгаруулсан "Спортын 100 аугаа хором" жагсаалтын 98-д нэрлэгджээ. Гриффит тухайн ондоо АНУ-ын сонирхогчдын спортын оны шилдэг тамирчны шагнал болох Жеймс Е.Салливаны шагналыг хүртсэн юм. Олимпоос тун удалгүй Гриффит-Жойнер хөнгөн атлетикаас зодог тайлсан билээ.

Харамсалтай нь 1998 оны 9 сарын 21-нд Гриффит-Жойнер гэртээ унтаж байгаад ертөнцийн мөнх бусыг үзүүлсэн юм.

Хардлага[засварлах]

Түүнийг сэргээш хэрэглэдэг байсан гэж хардах нь бий. 1988 онд түүний биеийн хэлбэр эрс өөрчлөгдөж, амжилт нь ч тун богино хугацаанд хурдтай сайжирсан[3]. 1988 оны улирал эхлэхээс өмнө түүний 100м дэх шилдэг амжилт нь 10.96 секунд байсныг ганцхан улиралд 0.47 секундээр ахиулсан бөгөөд өөр нэг ч тамирчин ийм ахиц үзүүлж байгаагүй билээ. Мөн 200м дэх хувийн дээд амжилт нь 21.96 секунд байсныг 21.34 болгож ахиулж чадсан юм. Тэр үүнийгээ бэлтгэлийн шинэ хөтөлбөрийг хэрэгжүүлсний үр дүн гэж тайлбарладаг байв.[4]

1989 оноос сэргээшийн хяналтыг сайжруулах асуудал шийдэгдсэн байсан үед өмнөхөн нь зодог тайлсан нь хардлагыг улам лавшруулдаг.[4]

Эшлэл[засварлах]

  1. Florence Griffith-Joyner NNDB Profile. NNDB. 2009 оны 2 сарын 25-д хандсан.
  2. Linthorne, Nick (March 2003). Wind Assistance. Brunel University. 2009 оны 2 сарын 25-д хандсан.
  3. "O doping está no auge", Veja Online, 2000-08-16 (Portuguese) 
  4. 4.0 4.1 Speed, glamour, doubt will be Flo-Jo's legacy, Reuters, September 23 1998

Гадаад холбоосууд[засварлах]