Алгирдас Бразаускас

А́лгирдас Бразаускас (литв. Algirdas Mykolas Brazauskas; 1932 оны 9-р сарын 22-нд Рокишкис хотод төрсөн — 2010 оны 6-р сарын 26-нд Вильнюс хотод нас барсан) — Литва улсын төрийн болон улс төрийн зүтгэлтэн, 1993-1998 онуудад Литва улсын Ерөнхийлөгч, 2001-2006 онуудад Литва улсын Ерөнхий сайд. Эдийн засгийн ухааны доктор (1974).

1993 оны 2-р сарын 14-нд тэрээр Бүгд Найрамдах Литва Улсын Ерөнхийлөгчөөр 60 хувийн санал авч 5 жилийн хугацаатай сонгогдсон байна. Тэрээр сонгогдсоныхоо дараа Литвын Үндсэн хуулийн дагуу 1993 оны 2-р сарын 19-нд Литвын Ардчилсан хөдөлмөрийн намын даргын албан тушаалаасаа огцорч, намын гишүүнчлэлээ түдгэлзүүлжээ. Түүний тангараг өргөх ёслол 1993 оны 2-р сарын 25-нд болсон.

1997 оны 10-р сарын 6-нд ерөнхийлөгчийн хувьд сүүлчийн хэвлэлийн бага хурал дээр тэрээр хоёр дахь удаагаа нэр дэвшихээс татгалзав. Түүний ерөнхийлөгчийн бүрэн эрхийн хугацаа 1998 оны 2-р сарын 26-нд дуусахад 1998 оны 1-р сард болсон сонгуульд ялсан Валдас Адамкус түүний халааг авсан юм.