Вильянуэвагийн их сургууль

Вильянуэвагийн их сургууль (Испани: Universidad Villanueva) нь Испанийн Мадрид хотод байрладаг хувийн их сургууль бөгөөд Католик шашны Opus Dei байгууллагатай холбоотой. Тус сургууль нь бакалаврын оюутны тоогоор Мадрид хотын хамгийн жижиг их сургуульд тооцогддог. Хэдий 2020 онд албан ёсоор их сургууль болсон ч тус сургуулийн түүх тэртээх 1977 оноос эхлэлтэй.

1997 онд Вильянуэвагийн их сургуулийн төв байгуулагдаж, Мадридын Комплутенсийн их сургуультай хамтран хууль зүйн бакалаврын зэрэг олгох хөтөлбөрийг эхлүүлсэн. Мөн тухайн жилд багш бэлтгэх “Escuela de Magisterio de Fomento” сургуулийн хөтөлбөрийг нэгтгэх гэрээ байгуулжээ. 1998–2015 оны хооронд сэтгэл зүйн боловсрол (1998), сэтгүүл зүй (2000), сурталчилгаа ба олон нийттэй харилцах (2000), кино судлал (2001), бизнесийн удирдлага ба менежмент (2014), сэтгэл судлал (2015) зэрэг хөтөлбөрүүдийг шат дараатай нээжээ. Түүнчлэн тус сургуулийн хүрээнд хуульчийн мэргэжлээр ажиллах эрх олгох сургалт, багшийн магистрын зэрэг, ерөнхий сэтгэцийн эрүүл мэндийн сэтгэл судлал, эрт үеийн хүүхдийн хөгжлийн дэмжлэг, сэтгэл судлал ба сурган хүмүүжлийн ухаан болон байгууллагын харилцаа холбооны чиглэлээр мастерийн хөтөлбөрүүд хэрэгжүүлж эхэлсэн.

Мадридын Комплутенсийн их сургуультай 23 жилийн турш хамтран ажилласны дараа 2020 оны 7 дугаар сарын 8-нд Мадридын өөртөө засах засгийн газрын зөвлөлийн тогтоолоор, мөн 2019 оны 3 дугаар сарын 20-нд батлагдсан 5-р хуульд үндэслэн Вильянуэвагийн их сургуулийг албан ёсоор хувийн их сургууль хэмээн хүлээн зөвшөөрсөн. Энэхүү шийдвэр нь сургуулийн төсөл төлөвшсөн, санхүүгийн хувьд найдвартай болохыг баталгаажуулсан бөгөөд 2020–2021 оны хичээлийн жилээс бие даасан байдлаар үйл ажиллагаагаа эхлэх боломжийг олгосон.