Додома

Додо́ма (свахили болон англ. Dodoma) — Танзани улсын нийслэл бөгөөд, Додома мужийн засаг захиргааны төв.

Додома нь Танзани улсын төв хэсэгт, Энэтхэгийн далайн зүүн эргээс 320 километрийн зайд, далайн түвшнээс дээш 1290 м өндөрт орших өндөрлөг дээр байрладаг.

Додома хотын хүн ам 410,000 гаруй юм. Нийслэлд Африкийн Ньямвези, Жагга, Хая, Гого, Масай болон бусад үндэстний төлөөлөгчид хотын оршин суугчдын бараг 99%-ийг бүрдүүлдэг юм. Үлдсэн хэсэг нь Араб болон Европын орнуудаас ирсэн цагаачдын үр удам юм. Албан ёсны хэл нь англи хэл (бизнесийн салбарт түгээмэл хэрэглэгддэг) болон свахили хэл юм.

Түүх

Додома хот нь 19-р зууны сүүлчээр Германы Зүүн Африкийн колоничлолын суурин газруудын нэг болж байгуулагдсан. 20-р зууны эхний арван жилд тэнд суурьшсан германчууд хотыг тус улсын томоохон хүн амын төвүүд, түүний дотор эдийн засаг, соёлын төв болох Дар эс Салаам боомттой холбох төмөр зам, төмөр замын барилгын ажлыг эхлүүлсэн байна.

Дэлхийн нэгдүгээр дайн дууссаны дараа Додома нь Их Британийн колоничлолын эзэмшлийн нэг хэсэг болжээ. Гэсэн хэдий ч Германы суурьшлаас гадна орон нутгийн африк ард түмэн, араб гаралтай төлөөлөгчид багтсан хотын иргэд Британийн эрх баригчдад маш их дургүйцэж байв. 1930-аад оны эдийн засгийн хямрал нь Британийн колоничлолын системийг эцэст нь сүйрүүлсэн билээ.

1996 онд Додома хот Танзанийн албан ёсны нийслэл болжээ. Засгийн газар болон тус улсын ерөнхийлөгчийн ордонг Додома руу нүүлгэсэн боловч гадаадын Элчин сайдын яамдууд, мөн засгийн газрын ихэнх агентлагууд, аж үйлдвэрийн аж ахуйн нэгжүүд, банкууд болон оффисууд хуучин нийслэл Дар эс Салам хотод үлдсэн юм.