Ирак

Чөлөөт нэвтэрхий толь — Википедиагаас
Харайх: Удирдах, Хайлт
Бүгд Найрамдах Ирак Улс
جمهورية العراق‎ (араб)
альжумхурия альиракия
کۆماری عێراق ‎(курд)комари эрак
тусгаар тогтносон орон, бүрэн эрхт улс
Төрийн далбаа Төрийн сүлд
Төрийн дууллын нэр:
موطني‎ → мавтини
«Эх нутаг минь»

Дэлхийн тал бөмбөрцөгт Иракийн байршил
Дэлхийн тал бөмбөрцөгт Иракийн байршил
Нийслэл Багдад
Том хот Басра, Мосул
Албан хэл араб хэл,
курд хэл
Ард түмэн  Иракийн ард түмэн:
80% – араб угсаатан
15% – курд үндэстэн
Төр засаг Холбооны байгууламж,
парламентийн бүгд
найрамдах засагтай
 -  Ерөнхийлөгч Фуад Масум (2014)
 -  Ерөнхий сайд Хайдер аль-Абади (2014)
 -  Улсын хурал «Төлөөлөгчдийн зөвлөл» (ТЗ)
 -  ТЗ-ийн дарга Салим аль-Жабури (2014)
Түүхэн явдал
 -  1932-10-03 Иракийн вант улс 
 -  1958-07-14 Бүгд найрамдах улс 
Нутаг дэвсгэр
 -  Бүх талбай 438,317 км2 (50)
 -  Гадаргын ус (%) 1.1
Хүн ам
 -  Тооцоо (2011) 30,399,572[1] (36)
 -  Нягт сийрэг 73.5 хүн/км2 
ДНБ (ХАЧТ) 2010 оны тооцоо
 -  Нийт дүн $113.366 тэрбум[2] 
 -  Нэг хүнд $3,537[2] 
ДНБ (Нэрлэсэн) 2010 оны тооцоо
 -  Нийт дүн $82.150 тэрбум[2] 
 -  Нэг хүнд $2,563[2] 
ОТББИ (2012) 29.5 (бага) 
ХХИ (2014) 0.654 (дундаж) (121)
Мөнгөний нэгж динар (IQD)
Цагийн бүс ГЦ+3
Домэйн нэр .iq
Томъёолбор +964 / IQ, IRQ / БНИраУ

Ира́к, албан ёсоор Бүгд Найрамдах Ирак Улс (БНИраУ) — Өрнө Азид оршдог бүрэн эрхт улс юм.

Ирак Персийн буланд гарцтай, хуурай газраар Турк, Иран, Кувейт, Саудын Араб, Иордан, Сиритэй хиллэдэг.

438 мянган км² газар, 38 сая хүн амтай. Багдад нийслэлтэй, Басра, Мосул зэрэг томоохон хоттой.

Тигр-Евфрат мөрний үржил шимт сав газар бүхий Иракт араб, курд, ассир, туркмен зэрэг ард түмэн амьдарч байна.

Лал шашны шийт, суннит шүтлэгтэй. 2004 оноос араб, курд хоёр хэл хамтаар улсын албан бичигт хэрэглэгдэж байна.

Эртний Ирак буюу Месопотамыг үсэг бичиг, газар тариалан үүссэн өлгий нутаг гэдэг. Шумер, Ассир, Вавилон зэрэг семит төрлийн хэлт хот улс, соёл иргэншил оршин байв. Перс, грекийн улсын мэдэлд орж яваад 7-р зуунаас лал шашин дэлгэрч, арабын соёлын төв болов. Куфад Рашидун, Багдадад Аббасын улс байгуулагдаж газар нутаг тэлэн гүрэн болцгоожээ. Лалын алтан үед Багдад шинжлэх ухаан, соёл гэгээрлийн төв байв. Дараа нь Ирак монгол, перс, түрэгийн харьяанд яваад Османы эзэнт гүрний задралаар 1920 онд Британийн эрхэнд оржээ. 1932 онд Иракийн вант улс тусгаар тогтнож, 1958 оны бүгд найрамдах улс болсон. Саддам Хусейн 1970-аад оноос хойш 2003 он хүртэл Иракийг удирдаж Иран, Кувейтийг эзлэхээр халдан дайрсан ч эцсийн дүндээ амжилт олоогүй. 2003 онд Америкийн тэргүүлсэн эвслийн цэрэг Иракт халдан довтолж шинэ төр засаг байгуулсан ба Иракт одоог хүртэл иргэний дайн үргэлжилж байна.

Хадмал толь
Монгол‎‎ бичиг Ираккирил
Араб үсэг العراق‎‎‎‎арабаль-Ирак
عێراق‎‎‎‎‎курдЭрак
Өрнийн латин Iraqангли
Кирил үсэг Иракорос
Лалын латин Irak‎‎‎‎‎турк
Ханз үсэг 伊拉克хятадИлаки
Кирил монгол бичигт тийн ялгалаар:
Ирак, Иракийн, Иракт, Иракийг, Иракаас, Иракаар, Ирактай, Ирак руу гэж хувилна.

Газар зүй[засварлах | edit source]

Ирак 437,072 хавтгай дөрвөлжин километр газар нутагтай, дэлхийн 59-р том орон юм.

Дээрээс харвал
Физик газрын зураг

Байрлал[засварлах | edit source]

Хойд өргөргийн 29° — 38°, зүүн уртрагийн 39° — 49° дотор Өрнө Ази, Өрнө өмнөд Азид хамааран байна. Өмнөд үзүүр талаараа Персийн буланд (58 км эрэг) тулж, бусад талаараа Иран (1599 км), Саудын Араб (79 км), Сири (599 км), Турк (367 км), Кувейт (254 км), Иордан (179 км) хиллэдэг. Тэгш өнцөгтөрхүү хэлбэртэй. Эргийн нийт урт - 3809 км.

Газрын тогтоц[засварлах | edit source]

Иракийн газар нутаг ерөнхийдөө Тигр-Евфрат хоёр мөрний сав, нам доор газар байна. Газрын тогтцоор цөл (баруун биед), Дээд Месопотам (Тигр-Евфратын хоорондох газар), Иракийн Курдистан буюу умардын уулархаг нутаг, Доод Месопотам буюу Персийн булан-Тикритийн хоорондох нам доор газар гэж дөрөв хуваана. Уулархаг нутаг нь Ираны тэгш өндөрлөг, Армены тэгш өндөрлөгт хуваагдана. Цөл нь Сирийн цөл, Арабын цөл юм. Хамгийн өндөр цэг нь Чеехадар (3611 м) уул, нам доор цэг нь Персийн булан (0 м).

Ус, хөрс[засварлах | edit source]

Тигр, Евфрат хоёр мөрөн Иракийн нутгийн голоор урсдаг. Үржил шимт газар юм. Хоёр мөрний бэлчирээс Шатт аль-Араб мөрөн үүсч Персийн буланд цутгадаг.

Нутгийн 7.89% газар тариаланд тохиромжтой.

Ургамал[засварлах | edit source]

Вавилоны байгаль

Иракийн нутгийн 2%-д ой байна. Өмнөд нутгаар дал мод, умард нутгаар царс, голын эргээр бургас ургадаг.

Ашигт малтмал[засварлах | edit source]

Ирак газрын тосны нөөцөөр Саудын Араб, Америкийн дараа дэлхийд 3-р байрт байна.

Уур амьсгал[засварлах | edit source]

Ирак цөлийн, эрс тэс уур амьсгалтай. Өвөлдөө 0 °C хүртэл сэрүүсч, зундаа 40 °C хүртэл хална.

Жилийн дундаж хур тунадас - 150 мм.

Хүн ам зүй[засварлах | edit source]

Он Хүн ам (сая)
1878 2.0
1947 4.8
1977 12.0
2009 31.9
2015 38.1
Шашин угсааны газрын зураг
Басрагийн оюутан
Али имамийн сүм

Ирак улсад 2015 оны байдлаар 38,146,025 хүн оршин сууж байна. Арабын хавтан дээрх хамгийн олон хүнтэй улс юм. Үүнд 0-14 насны багачууд 38%, 15-64 насны хөдөлмөрийн чадвартан 59%, 65-аас дээш өндөр настан 3%-ийг бүрдүүлж байна. Дундаж наслалт - 68 жил. Хүйсийн харьцаа - 1.03 эр/эм. Хүн амын жилийн өсөлт - 2.2%. Хүн амын 78.2% бичиг үсэгт тайлагдсан. Эрэгтэйд 86.0%, эмэгтэйд 70.6% байна.

Ард түмэн[засварлах | edit source]

Иракийн хүн амын 75%–80% нь араб угсаатан, 15% нь курд үндэстэн байдаг бол үлдсэн цөөн хувийг ассир, туркмен, армен, черкес, перс, шабак, язиди зэрэг ард түмэн эзэлдэг.

Хэл бичиг[засварлах | edit source]

Улсын албан ёсны хоёр хэл нь 2004 оноос хойш араб, курд хэл байна.

Араб хэлийг араб үсгээр, курд хэлийг сорани үсгээр бичдэг. Курд нь иран төрлийн хэл болно.

Шашин шүтлэг[засварлах | edit source]

Хүн амын 97% лалын шашин шүтлэгтэй. Үүний 51% нь шийт, 42% нь суннит урсгалыг дагагч байна.

Үлдсэн бага хувьд христ, манд, язиди шашин шүтлэг байна.

Хот суурин[засварлах | edit source]

Иракийн хүн амын 65% хот газар суудаг. Томоохон хотоос дурдвал:

Түүх[засварлах | edit source]

Ассирын ордны сийлбэр

Эртний үе[засварлах | edit source]

Иракт 65,000 жилийн настай эртний олдвор Шанидар агуйнаас олджээ. Иракийг эртнээс Месопотам гэсэн.

Месопотам Левант нутгийн нэгэн хэсэг болохын хувьд бичиг үсэг, газар тариалан, хурд дугуй үүссэн өлгий юм.

Шумер, Ассир, Аккад, Вавилон зэрэг семит төрлийн хэлтэн, эртний улс, соёл иргэншил Месопотамд төвлөн оршиж байв.

НТӨ 6-р зуунд персийн Ахемен, НТӨ 4-р зуунд грек Селевк, НТ 3-р зуунд персийн Парфян, Сасаны улсын харьяанд тус тус оржээ. Шинэ Ассирын хот улсууд 256 онд персэд эзлэгдсэн байв.

850 он. Аббасын халифт улсын нийслэл нь Багдад байв.

Арабын улс[засварлах | edit source]

Лал шашны дэлгэрэлт, арабын байлдан дагууллын хүрээнд Рашидун улс Иракийн Куфа хотод нийслэл байгуулжээ. 7-р зуунд Сирийн Дамаскад төвлөсөн Умаяны улсын харьяанд оржээ.

8-р зуунд Аббасын халифт улс Иракийн Багдадад төвлөн байгуулагдаж, хол ойрыг байлдан дагуулсан эзэнт гүрэн болов. Аббасын улсын үеийг Лалын алтан үе гэдэг бөгөөд гүн ухаан (философи), тооны ухаан (математик), одон орон, утга зохиол, дүрслэх урлаг, уран барилга, анагаах ухаан, арга ухаан (технологи)-д ололт амжилт гарчээ.

Харьяа нутаг[засварлах | edit source]

Османы харьяанд Аль-Жазира, Курдистан, Ирак, Аль-Шам гэсэн дөрвөн муж болж байв

1257 онд Ираны Табризад төвлөсөн монгол Хүлэгүгийн улс Багдадыг эзэлж, халифыг хороожээ. Багдад ихээр сүйтгэгдсэнд лалын шашинтны төв Египетийн Каирт шилжиж, Аббасын угсааны язгууртан Каирт халиф өргөмжлөгджээ.

1401 онд түрэг монгол Төмөр хаан Багдадыг байлдан дагуулав. 15-р зуунд туркмен Иракийг эзэлжээ.

Ирак 1508 онд Цагаан хоньт туркмений харьяанаас Иран дахь персийн Сафавын улсын харьяанд шилжив.

1639 онд турк Османы эзэнт гүрний харьяанд оржээ. Османы үед Ирак овог аймаг, улс орнуудын байлдааны талбар болсоор байв. Арабын хойгийн Наждаас бедуйн цэрэг довтолдог байв. 1747-1831 онд Иракийг гүрж үндэстэн, мамлюк давхрааны ноён эзэн мэдэж байсныг 1831 онд Османы улс халж шууд харьяа нутаг болгожээ.

Дэлхийн нэгдүгээр дайнд нутгийн ардын дэмжлэгтэйгээр Британийн цэрэг Иракт Османтай байлдан дийлж эзлэв. Үндэстний холбооноос Иракийг тохинуулах эрх авсан Британи Хашимын угсааны I Фейсалыг вангаар өргөмжлөв. 1920 онд боолчлох ёсыг халав. Үүнээс хойш 2004 он хүртэл суннит шашинтан Иракийн төрийн өндөр албан тушаалд ажиллаж байв.

Вант улс[засварлах | edit source]

1932 онд Иракийн вант улс тусгаар тогтнов. Британийн цэрэг Иракт байрласан хэвээр байв. 1933 онд Гази ван эцгийн халааг авч, 1939 онд II Фейсал ванд ор залгуулжээ. Абд аль-Ила балчир вангийн өмнөөс төр барьж байхад 1941 онд Рашид Али аль-Гаялани төр эргүүлэв. Газрын тосны нийлүүлэлт зогсох вий гэж эмээсэн Британи Иракт байрлаж буй цэргээ хөдөлгөн шинэ төр засагтай байлдан дийлж вангийн төрийг буцаан сэргээжээ.

Бүгд найрамдах улс[засварлах | edit source]

Саддам Хусейн

1958 оны 7 сарын 14-нд Абд аль-Карим Касим генерал цэргийн хүчээр төрийн эрхийг авч, вангийн амийг тасдав. Энэ хувьсгал хаант ёсыг халахад голлон чиглэсэн, бага зэрэг социалист үзэлтэй байсан. 1963 онд Абдул Салам Ариф хурандаа өмнөх удирдлагыг хөнөөж, цэргийн хүчээр төр эргүүлсэн бол 1968 онд Арабын Социалист Баас Нам төр эргүүлэв.

1970-аад онд Саддам Хусейн аажмаар төрийн эрхэнд гарав. 1973 оны газрын тосны үнийн өсөлтөөр санхүүжигдэн боловсрол, бичиг үсэг тайлагдалтыг ахиулж, эдийн засгийг олон талт байдлаар хөгжүүлж, дэд бүтцийг хөгжүүлэв. 1979 онд Иранд хаант ёсыг халсан хувьсгал гарч, шийт шашинтныг хувьсгалд уриалсанд Саддам Хусейн Иракийн ерөнхийлөгч болж, хүн амын олонх болсон шийт шашинтныг төрийн эргэлт гаргуулахгүй сэргийлэхийн тулд цэрэг, цагдаагийн байгууллагыг хүчирхэгжүүлжээ.

1980 онд Ирак Иран луу довтлон Хузестаныг эзэлсэн ч хоёр жилийн дотор Иран эзлэгдсэн нутгийг чөлөөлж Ирак руу давшив. 1988 онд 1 сая орчим хүний амь гарзадсан дайн намжжээ.

1990 онд Ирак Кувейт рүү довтлон эзэлсэнд Америк тэргүүтэй эвслийн хүчин Иракийг бөмбөгдөн Кувейтийг чөлөөлжээ. Иракийн шийт, курдын эсэргүүцлийг цагдаагийн хүчээр дарав. Хуссейн дарангуй удирдагч байсан бөгөөд химийн зэвсгийг хөгжүүлж босогч, эсэргүүцэгчдийн эсрэг хэрэглэжээ.

Курд, шийтийн Ирак[засварлах | edit source]

2003 он. Америкийн эргүүл
2016 оны 11 сар. Иргэний дайны газрын зураг. Ягаан (Иракийн төр засаг), саарал (Исламын улс), шар (курд)

2003 онд Америк тэргүүлсэн эвслийн цэрэг Ирак руу халдан довтолж Саддам Хусейныг огцруулж, 2006 онд хүн төрөлхтний эсрэг гэмт хэрэгтэн гэж яллан цаазаар аваачжээ. 2003-2011 онд Ирак Америк, Их Британи зэрэг олон улсын энхийг сахиулах зэвсэгт хүчний хяналтанд байсан. Америкийн цэргийн эсрэг халдлага болсоор байв.

Иракийн шинэ төр засгийн өндөр албан тушаалд курд, шийтийн хүн томилогдож, араб хэл улсын албан ёсны хэл байсны дээр курд хэлийг нэмж мөн албан ёсны болгожээ. Иракийн Курдистан нутгийн өөртөө засах эрх нэмэгджээ.

Иракт суннит-шийтийн мөргөлдөөн байнга явагдаж, 2011 оны Сирийн иргэний дайны нөлөө 2014 оноос Иракт дайн болов. Суннит босогчид Исламын улс зэвсэгт бүлэглэлд нэгдэж Тикрит, Мосул, Фаллужа зэрэг томоохон хот бүхий умард нутгийг хяналтандаа байлган төр засгийн эсрэг байлдаж байна.

Лавлах бичиг[засварлах | edit source]

  1. https://www.cia.gov/library/publications/the-world-factbook/geos/iz.html
  2. 2.0 2.1 2.2 2.3 Iraq. International Monetary Fund. 2011-04-21-д хандсан.

Гадаад холбоос[засварлах | edit source]

Commons
Викимедиа дуу дүрсний сан: العراق