Метронидазол

Метронидазол нь Flagyl, Metrogyl зэрэг худалдааны нэрээр танигдсан антибиотик болон эгэл биетний эсрэг үйлдэлтэй эм юм. Энэ эмийг аарцгийн эрхтний үрэвсэлт өвчин, эндокардит, бактерийн гаралтай үтрээний үрэвслийг эмчлэхэд дангаар нь эсвэл бусад антибиотиктой хавсран хэрэглэдэг. Мөн дракункулез, лямблиоз, трихомониаз, амебиаз зэрэг өвчний эмчилгээнд үр дүнтэй. Ванкомицин эсвэл фидаксомицин хэрэглэх боломжгүй тохиолдолд хөнгөн болон дунд зэргийн явцтай Clostridioides difficile-ийн үүсгэсэн колитын анхны үеийн эмчилгээнд сонголт болгон хэрэглэж болно. Метронидазол нь ууж хэрэглэх шахмал, тосон түрхлэг, гель болон судсаар удаан дуслаар хийх тарилгын хэлбэрээр үйлдвэрлэгддэг.

Метронидазолын хамгийн түгээмэл гаж нөлөөнд дотор муухайрах, аманд төмөрлөг амт мэдрэгдэх, хоолны дуршил буурах, толгой өвдөх зэрэг орно. Ховор тохиолдолд таталт өгөх эсвэл эмийн харшлын урвал илэрч болно.

Метронидазолыг 1960 онд Франц улсад анх худалдаанд нэвтрүүлсэн. Энэхүү эм нь Дэлхийн Эрүүл Мэндийн Байгууллагын Зайлшгүй шаардлагатай эмийн жагсаалт-д багтдаг бөгөөд дэлхийн ихэнх улс оронд өргөн хэрэглэгддэг. 2023 онд АНУ-д хамгийн түгээмэл жорлогдсон эмүүдийн 203 дугаарт бичигдэж, 2 саяас давсан жор олгогджээ.