Михаил Фридман

Михаил Фридман (орос. Михаи́л Мара́тович Фри́дман, 1964 оны 4-р сарын 21-нд Зөвлөлт Украины Львов хотод төрсөн) — Оросын ажил хэрэгч хүн тэрбумтан, зөвлөлтийн төмөрлөгийн аж үйлдвэрийн инженер. Оросын "Альфа групп"-ийн консорциумын хамтран эзэмшигч, Хяналтын Зөвлөлийн дарга.

Түүнийг Орос (2022 оны 3-р сар хүртэл) болон Их Британийн хамгийн баян бизнес эрхлэгчдийн нэг гэж үзсэн. 2019 онд The Times сонин Фридманыг 15 тэрбум долларын хөрөнгөтэй, Лондоны хамгийн баян оршин суугч гэж зарласан юм. 2021 онд Форбс сэтгүүл 15.5 тэрбум долларын хөрөнгөтэй Михаил Фридманыг Оросын хамгийн баян бизнес эрхлэгчдийн жагсаалтын 11-р байранд оруулсан байна. 2022 онд Форбс сэтгүүл Михаил Фридманы хөрөнгийг 11.8 тэрбум доллараар үнэлсэн нь Оросын тэрбумтнуудын жагсаалтын зургаа дахь байрт орсон байна. 2023 онд М.Фридман мөн Forbes сэтгүүлээс гаргасан тэрбумтнуудын дэлхийн чансааны 140-р байрыг эзэлж байжээ.

Тэрээр Израил болон Оросын иргэншилтэй. 2015 оноос хойш тэрээр Их Британид байнга оршин суусан бөгөөд 2016 онд Атлон Хаусыг 65 сая фунт стерлингээр худалдаж авсан. Европын холбоо түүний эсрэг хориг арга хэмжээ авсны дараа ч тэндээ амьдарсаар байсан.

Тэрээр 2023 оны 10-р сард Израил руу нүүсэн бөгөөд Орост тогтмол ирж байхаар төлөвлөж байсан тухай хэвлэлүүд мэдээлж байв. Энэ мэдээллийг "Альфа" групп мөн баталжээ.

Орос Украин руу довтолж эхэлсний дараа тэрээр янз бүрийн шалтгааны улмаас АНУ, Европын Холбоо, Их Британи, Канад болон бусад хэд хэдэн орны хувийн хоригт өртсөн байна.