Монгол-Лаосын харилцаа

Чөлөөт нэвтэрхий толь — Википедиагаас
Jump to navigation Jump to search

Монгол Улс-Лаосын Вант Улстай (1975 онд Бүгд Найрамдах Ардчилсан Лаос Ард Улс болж нэрээ өөрчилсөн) 1962 оны 9 дүгээр сарын 12-нд дипломат харилцаа тогтоосон. Монгол Улс 1976 онд Вьентьянд, БНАЛАУ 1981 онд Улаанбаатар хотноо тус тус ЭСЯ-даа нээн ажлуулж байна. Хоёр улс далайд гарцгүй орнууд гэдгээрээ ижил төстэй.

Өнөөгийн байдлаар хоёр улс “Бие биеэ дэмжин харилцан ашигтай хамтын ажиллагаа хөгжүүлэх зарчим” дээр тулгуурласан найрсаг харилцаа, хамтын ажиллагаа хөгжүүлж байна.

Түүх[засварлах | edit source]

1962-1975 онд хоёр орны харилцаа үндэсний баяр, тэмдэглэлт ойг тохиолдуулан баяр хүргэсэн цахилгаан утас солилцох хэмжээнд, төдийлөн идэвхтэй бус байдалтай явж ирсэн.

1975 оны 12 дугаар сарын 2-нд БНАЛАУ-ыг тунхаглаж марксист-ленинист үзэл баримтлалтай, социалист чиг баримжаатай нэг намын засаглал тогтож тухайн үеийн ЭЗХТЗ-ийн хүрээлэлд орж ирснээр БНМАУ, БНАЛАУ-ын хоорондын харилцааг хөгжүүлэх шинэ боломж нээгджээ. БНАЛАУ-ын Ерөнхийлөгч Кейсон Фомвиханы Монгол Улсад 1976 oнд хийсэн айлчлал, хэлэлцээ ярианы дүнд Монгол Улсын ЭСЯ-ыг Вьентьян хотноо байгуулах шийдвэрт тухайн үеийн манай улсын нам, төрийн удирдлага хүрчээ. Чингээд МАХН-ын Төв Хорооны УТТ-ны 1976 оны 5 дугаар сарын 10-ны өдрийн 120 дугаар тогтоолоор ЭСЯ байгуулах шийдвэр батлагдсан байна.

1975-1990 онд дээд, өндөр хэмжээний айлчлал харилцан хийгдэж, Монгол-Лаосын Хамтарсан Тунхаглал /1976 онд/, Найрамдал, хамтын ажиллагааны тухай анхны Гэрээ /1979 онд/ байгуулагдсан.

БНАЛАУ-ын Сайд нарын Зөвлөлийн дарга 1976, 1988 онд, БНАЛАУ-ын Ерөнхийлөгч 1980 онд Монголд, БНМАУ-ын Сайд нарын Зөвлөлийн дарга 1979 онд Лаост айлчилсан.

1994 онд Монгол Улсын анхны Ерөнхийлөгч П.Очирбат Лаост төрийн айлчлал хийж, "Монгол Улс, БНАЛАУ-ын Найрсаг харилцаа, хамтын ажиллагааны тухай Гэрээ" байгуулсан нь шинээр бүрэлдсэн нөхцөлд хоёр улсын харилцааны эрх зүйн үндсийг суурийг тавьснаар чухал ач холбогдолтой болсон.

2005 онд Ерөнхийлөгч Н.Багабанди, 2012 онд Ерөнхийлөгч Ц.Элбэгдорж нар БНАЛАУ-д албан ёсоор айлчилж, 1980,1985, 2007 онуудад БНАЛАУ-ын Ерөнхийлөгч нар Монгол Улсад айлчилж байжээ.

2016 оны 7 дугаар сард Улаанбаатар хотноо болсон АСЕМ-ын 11 дүгээр дээд хэмжээний уулзалтад БНАЛАУ-ын Ерөнхий сайд Тонглун Сисулит тэргүүтэй төлөөлөгчид оролцсон.

Монгол, БНАЛАУ-ын Засгийн газар хоорондын Комиссын 10 дугаар хуралдаан 2015 онд Вьентьян хотноо, 2018 онд Улаанбаатар хотод ээлжит 11 дүгээр хуралдаан болжээ.

Парламент хоорондын харилцаа[засварлах | edit source]

УИХ-ын дарга 1998 онд, Лаосын Үндэсний Ассамблейн дарга 2000 онд, УИХ-ын дэд дарга 2002 онд тус тус айлчилж байсан. Мөн сүүлд Лаосын Үндэсний Ассамблейн дарга Тонгсинг Таммавонг 2008 онд, 2012 онд Лаосын Үндэсний Ассамблейн дарга хатагтай Пани Ятодү Монгол Улсад айлчилсан бөгөөд УИХ-ын дарга Д.Дэмбэрэл тэргүүтэй төлөөлөгчид 2008 оны оны 12 дугаар сард Лаост тус тус харилцан албан ёсоор айлчилсан.

Боловсролын хамтын ажиллгааа[засварлах | edit source]

Хоёр улсын Боловсролын яам хооронд байгуулсан оюутан солилцооны баримт бичгийн дагуу жилд 8 оюутан харилцан солилцож суралцаж байдаг байна. 2019 оны байдлаар Монгол улсын их дээд сургуулиудад 48 лаос оюутан, Лаост Монголын 19 оюутан суралцаж байна. 1978 оноос хойш өнөөг хүртэл Монголд 140 орчим лаос иргэн хүний эмч, малын эмч, хөдөө аж ахуйн мэргэжилтэн, монгол хэл зэрэг мэргэжлээр дээд боловсрол эзэмшсэн байна.

Тусламж[засварлах | edit source]

1980-аад онд БНМАУ-ын Засгийн газар БНАЛАУ-ын Засгийн газарт тусламж үзүүлж Сиенгхуанг мужийн төвд 60 ортой эмнэлэг, хонь ямааны станц зэргийг барьж өгсөн. 2018 оны 11 дүгээр сард Монгол Улсын Засгийн газраас хүмүүнлэгийн тусламжаар 1050 толгой хонийг Лаост онгоцоор хүргэж өгснийг БНАЛАУ-д суугаа Элчин сайд Л.Галбадрах Лаосын талд албан ёсоор хүлээлгэн өгчээ.

2003 онд Лаосын Үндэсний Ассамблейгаас Монгол Улсын Их Хуралд улаан модон тавилга бэлгэлэсэн нь өнөөдөр УИХ-ын танхимд байна.

Монгол Улсаас БНАЛАУ-д сууж байсан элчин сайд нар[засварлах | edit source]

  1. Д.Цэрэндорж -1963 оны 05 дугаар сарын 14-нд ИЖБ барьсан -1968 /Ханой хотоос хавсарч байсан/
  2. Д.Батаа -1969-1972 /Ханой хотоос хавсарч байсан/
  3. О.Цэнд -1972-1976 /Ханой хотоос хавсарч байсан/
  4. П.Цэрэнцоодол -1976 оны 11 дүгээр сарын 27-нд ИЖБ барьсан.-1978 /Лаост дахь анхны суурин Элчин сайд/
  5. Ж.Нямаа -1978-1982
  6. О.Нямаа -1982-1984
  7. Я.Дашням -1984-1988
  8. Ю.Сандаг -1988-1991
  9. Т.Төмөрхүлэг -1991-1996
  10. Л.Баярт -1996- 2000
  11. Н.Алиасүрэн -2001-2005
  12. Р.Янжмаа-2005-2006 /Түр хамаарагч/
  13. Т. Батбаатар -2006-2011
  14. Т.Жанабазар -2012-2015
  15. Л.Галбадрах -2015.07 сараас