Поль Ландовски

Поль Максимильен Ландовски (франц. Paul Maximilien Landowski; 1875 оны 6-р сарын 1-нд Парис хотод төрж, 1961 оны 3-р сарын 31-нд Булонь-Бийанкурт нас барсан) — Польш гаралтай Францын монументаль уран барималч, Рио-де-Жанейро дахь Аврагч Христийн хөшөөг бүтээгч.

Поль Ландовски нь Польшийн эмч Эдвард Ландовски болон Бельгийн нэрт хийлч, хөгжмийн зохиолч Анри Вьехтампсын охин Жули Анриетта Вьехтампс нарын хүү юм. Алжирын Эрүүл мэндийн хүрээлэнгийн захирал эцэг нь сувилал байгуулах үеэр тэрээр бага насаа Алжирт өнгөрөөсөн байна. 7 настайдаа Поль эцэг эхээ алджээ. Эх нь 1882 оны 10-р сарын 28-нд, эцэг нь хэд хоногийн дараа буюу 11-р сарын 6-нд нас баржээ. Поль ах дүү Владислав, Хенрик, Йозеф, Франчишка нарын хамт Парис руу буцаж ирэхэд авга ах Павел Ландовски асрах болжээ.

Поль дунд боловсролоо Роллин коллежид авсан. Тэрээр гимназид уран зохиолын хичээлээ үргэлжлүүлж, 1892 онд зохиолч Анри Барбюссетэй танилцаж, олон арван нийгмийн санаа бодлоо хуваалцсан гэдэг. Дараа жил нь тэрээр Жулианы академид элсэн орж анатомийн мэргэжилтэн болж, Анагаах ухааны сургуульд өдөр бүр задлан шинжилгээнд оролцож, профессор Луис Фарабефийн анатомийн диаграмм зурдаг байжээ. 1895 онд Ландовски Урлагийн дээд сургуульд элсэн орж, академик уран барималч Луис-Эрнест Барриасын урланд 5 жил суралцжээ. Тэрээр 1900 онд "Давид Голиафтай тулалдаж буй нь" зургаараа нэр хүндтэй Ромын шагнал хүртэж төгссөн юм.

Түүний хамгийн алдартай бүтээл бол Рио-де-Жанейро дахь Аврагч Христийн аварга том хөшөө бөгөөд Ландовски Бразилийн инженер Хейтор да Силва Костагийн төлөвлөгөөний дагуу 5 жилийн хугацаанд бүтээсэн юм. Өөр нэг алдартай бүтээл бол Женевийн Их Сургуулийн оюутны хотхон дахь "Шинэчлэлийн хана" нэртэй баримлуудын цогц юм.