Серж Саркисян
Серж Саркисян (армени. Սերժ Ազատի Սարգսյան; 1954 оны 6-р сарын 30-нд ЗХУ-ын Азербайжаны Степанакерт хотод төрсөн) -төрийн, улс төрийн болон цэргийн зүтгэлтэн. 2008 оны 4-р сарын 9-нөөс 2018 оны 4-р сарын 9-ний хооронд Бүгд Найрамдах Армени Улсын Ерөнхийлөгч, 2007-2008 онд болон 2018 оны 4-р сарын 17-23-ны хооронд Армени Улсын Ерөнхий сайдаар ажилласан.
Намтар
[засварлах | кодоор засварлах]Серж Саргсян 1954 онд Азербайжаны ЗХУ-ын Уулын Карабах автономит мужийн засаг захиргааны төв Степанакерт хотод төрсөн. Сержийн эцэг Азат Саркисян 1937 онд хэлмэгдсэн бөгөөд үүний дараа тэдний гэр бүл Степанакерт руу нүүжээ.
Серж Саркисян 1971-1979 онд Ереваны Улсын Их Сургуулийн Филологийн факультетэд суралцсан. 1972-1974 он - ЗХУ-ын Зэвсэгт хүчинд алба хаасан байна. 1975-1979 он - Ереваны цахилгаан инженерийн үйлдвэрийн токарчин байсан.
1979-1988 он - Комсомол, намын байгууллагад ажилласан: Азербайжаны Комсомолын Степанакерт хотын хорооны хэлтсийн дарга, хоёрдугаар нарийн бичгийн дарга, нэгдүгээр нарийн бичгийн дарга, Азербайжаны Уулын Карабах мужийн Коммунист намын хорооны нэгдүгээр нарийн бичгийн даргын туслах.
1988 оноос хойш Серж Саркисян Уулын Карабахыг Арменид нэгтгэх зорилготой "Карабах хөдөлгөөн"-ийн удирдагчдын нэг болсон юм. 1989 оноос хойш тэрээр Армений үндэсний хөдөлгөөний намын гишүүн: 1989 оны 11-р сард болсон анхны их хуралд Уулын Карабахаас төлөөлөгчөөр сонгогдсон. 1990 онд тэрээр Арменийн Дээд Зөвлөлийн депутатаар сонгогдсон байна.
1992-1993 онд Уулын Карабах улсын Батлан хамгаалахын сайдын үүрэг гүйцэтгэгч байсан. 1993 оны 8-р сарын 21-ээс 1995 оны 5-р сарын 18 хүртэл тэрээр Арменийн ерөнхийлөгч Левон Тер-Петросяны томилсоноор Арменийн Батлан хамгаалахын сайдын албыг хашсан. 1996 оны 11-р сараас 1999 оны 6-р сар хүртэл - Арменийн Дотоод хэрэг, үндэсний аюулгүй байдлын сайд.
2008 оны 2-р сарын 19-нд Серж Саркисян сонгогчдын 52,82 хувийн санал авч Арменийн Ерөнхийлөгчөөр сонгогдов. Саркисяныг сонгуулийн гол өрсөлдөгч Ерөнхийлөгч асан Левон Тер-Петросян тэргүүтэй өрсөлдөгчид Ереван хотод олон нийтийг хамарсан эсэргүүцлийн жагсаал зохион байгуулав. Саркисяны ялалтыг хүлээн зөвшөөрөөгүй жагсагчид сонгуулийн үеэр нэлээд олон зөрчил гарсныг онцолж, дүнгээ эргэн харахыг шаарджээ. 2008 оны 3-р сарын 1-нд бүрэн эрхээ дуусгавар болсон ерөнхийлөгч Роберт Кочарян тус улсын нийслэлд 3-р сарын 21 хүртэл онц байдал зарласан.
2008 оны 8-р сард Гүржид болсон дайны үеэр Саркисян болгоомжтой байр суурь баримталж, Өмнөд Осети, Абхазын тусгаар тогтнолыг хүлээн зөвшөөрөхийг шууд дэмжээгүй байна.
2012 оны 5-р сарын 6-нд Арменид парламентын сонгууль болж, Саркисян тэргүүтэй Арменийн Бүгд найрамдах нам ялалт байгуулж, сонгогчдын 44.02 хувийн санал авч, Үндэсний ассамблейн 131 суудлын 69-ийг авчээ.
2013 оны 2-р сарын 18-нд Саркисян 58,64 хувийн санал авч, ерөнхийлөгчийн албан тушаалд улиран сонгогдов. Серж Саркисяныг хоёр дахь удаагаа бүрэн эрхийнхээ хугацаанд Арменид (2015) Үндсэн хуульд өөрчлөлт оруулах санал асуулга явуулж, тус улсыг хагас ерөнхийлөгчийн засаглалаас парламентын Бүгд найрамдах улс болгох өөрчлөлтийг хийсэн юм.