Википедиа — Чөлөөт нэвтэрхий толь
Хлоритын бүлэг
Хлорит нь бага зэргийн хувиралд орсон чулуулгууд болон өөрчлөгдсөн магмын чулуулгуудад элбэг тохиолддог навчит силикат эрдсүүдийн нэг бүлэг юм. Базальт болон цахиурын агууламж багатай галт уулын чулуулгууд хувирах үед үүсдэг ногоон занар ихэвчлэн хлорит их хэмжээгээр агуулдаг.Хлоритын эрдсүүдийн химийн найрлага ихээхэн ялгаатай байдаг. Талст бүтцэд нь магни, төмөр, хөнгөн цагаан, цахиур хоорондоо солигдон орших боломжтой. Хамгийн түгээмэл хоёр төрөл нь магни ихтэй клинохлор болон төмөр ихтэй шамозит бөгөөд эдгээрийн хооронд бүрэн уусалтын цуваа бий. Мөн манган, цайр, литий, кальци агуулсан хлоритын төрөл ч байдаг. Найрлага нь олон янз байдаг тул хлоритын физик, оптик болон рентген шинж чанар ихээхэн өөрчлөгддөг. Иймээс хлорит нь температур, даралтын өөр өөр нөхцөлд үүсч чаддаг бөгөөд бага болон дунд температурын хувирмал чулуулгууд, зарим магмын чулуулгууд, гидротермаль гаралтай чулуулгууд болон гүнд хуримтлагдсан тунамал хурдсанд түгээмэл тархсан байдаг.“Хлорит” гэдэг нэр нь өнгийг нь илэрхийлсэн, грек хэлний “chloros” буюу “ногоон” гэсэн үгнээс гаралтай.
