Цагаан феминизм

Цагаан феминизм гэдэг нь тодорхой феминист үзэл, үйлдлийг дүрсэлдэг нэр томьёо бөгөөд энэ нь үндэсний цөөнх, ядуу эмэгтэйчүүд, хөгжлийн бэрхшээлтэй хүмүүсийн амьдралын туршлага, нөхцөлийг хүлээн зөвшөөрөхгүй, тэднийг тусгахгүй байгаа явдлыг шүүмжилдэг. Энэхүү нэр томьёо нь ихэвчлэн шүүмжлэл хэлбэрээр хэрэглэгддэг бөгөөд феминизм нь зөвхөн хүйсийн үзлээр хязгаарлагдаж, бусад хавчигдмал байдал (жишээлбэл, арьс өнгө, анги давхарга, бэлгийн чиг баримтлал гэх мэт)-ыг орхигдуулж байгаа хэмээн үздэг.

Цагаан феминизм нь үндэсний цөөнхийн эмэгтэйчүүдийн туршлагыг тусгаагүй, эсвэл тэдний дуу хоолойг алгассан, цөөнх эмэгтэйчүүдийн асуудлыг ганц тэнхлэгийн хүрээнд авч үздэг гэж шүүмжлэгддэг. Тодруулбал, цагаан феминизм нь дийлэнхдээ цагаан арьстай, дундаж ангийн, хетеросексуал, эрүүл биетэй эмэгтэйчүүдийн эрх мэдэл, эрх ашгийн төлөө төвлөрдөг. Энэ нь барууны нийгэм дэх феминизмийн анхны давлагаануудад ажиглагдаж байсан ба тухайн үед дундаж ангийн эмэгтэйчүүдийн эрх чөлөөг чухалчилдаг байжээ.

Цагаан феминизм гэх нэр томьёо нь сүүлийн үед гарч ирсэн ч, уг ойлголтын шүүмжлэл нь АНУ-д хэдийнэ урт хугацааны түүхтэй. Энэхүү ойлголт нь сүүлийн жилүүдэд, ялангуяа 2010-аад оноос хойш улам их хэрэглэгдэх болж, үндэсний хэмжээний яриа хэлэлцүүлэгт өргөнөөр орж ирсэн. Гэсэн ч зарим хүмүүс энэ нэршлийг буруугаар хэрэглэгддэг, цагаан феминистүүдийг дайрах зорилгоор ашигладаг хэмээн шүүмжилдэг.