Энтони Блинкен

Чөлөөт нэвтэрхий толь — Википедиагаас
Jump to navigation Jump to search
Энтони Жон Блинкен

Энтони Жон Блинкен (англ. Antony John Blinken; 1962 оны 4 дүгээр сарын 16-нд Нью-Йоркт төрсөн) – Америкийн төрийн зүтгэлтэн, 2015-2017 онд АНУ-ын Төрийн нарийн бичгийн даргын орлогч байсан. 2021 оны 1 сараас, шинэ ерөнхийлөгч Жо Байдены засаг захиргаанд АНУ-ын Төрийн нарийн бичгийн даргаар томилогдохоор зарлагдаад буй.

Эцэг нь Дональд Блинкен Нью-Йорк хотын нөлөө бүхий хуульч, эх нь Жудит Блинкен бүжгийн хамтлагийн зохион байгуулагч. Нью-Йорк хотын нэр хүндтэй хувийн Далтоны дунд сургуульд сурч байсан. 1970 онд эцэг эх хоёр нь салсан бөгөөд жилийн дараа эх нь польш гаралтай фашистын Холокостын хорих лагераас амь гарсан хууль, зохиолч Самюель Пизартай (Samuel Pisar) гэрлэж Францын Парис хот руу амьдархаар нүүсэн ажээ. 1984 онд Э.Блинкен Харвардын Их сургуулийг дүүргэж Колумбийн Их сургуульд үргэлжлүүлэн суралцсан байна. "New Republic"-т сурвалжилга бичиж эхэлсэн бөгөөд 1988 онд хуулийн доктор цол хүртээд Нью-Йорк хотод өмгөөлөгчийн ажил эрхэлсэн байна.

1994-2001 онуудад Ерөнхийлөгч Билл Клинтоны гадаад бодлогын асуудлаарх "Спичрайтер" буюу "хэлэх үг боловсруулагч" байсан бөгөөд АНУ-ын Үндэсний аюулгүй байдлын Зөвлөлийн аппаратад ажиллаж байжээ. Ерөнхийлөгчийн Европтой харилцах асуудлыг эрхэлсэн тусгай туслах байсан.

Барак Обамагийн 2009-2013 оны Ерөнхийлөгчийн бүрэн эрхийн хугацаанд Тони Блинкен Дэд ерөнхийлөгч Жо Байдены Үндэсний аюулгүй байдлын зөвлөхөөр ажиллаж байжээ.

2013-2015 онд АНУ-ын Ерөнхийлөгчийн Үндэсний аюулгүй байдлын зөвлөхийн орлогч, 2015-2017 онд АНУ-ын Төрийн нарийн бичгийн даргын орлогч зэрэг албан тушаал хашиж байжээ.

2014 онд Тони Блинкен АНУ-ын "Крымын хямрал"-ын эсрэг хариу арга хэмжээг буюу Оросын болон Путиний эсрэг хориг арга хэмжээ авах саналыг тодорхойлоход чухал үүрэг гүйцэтгэсэн хүн юм.

2001 онд ирланд гаралтай католик шашинтан Эрин Райантай (Erin Ryan) Вашингтон хотод гэрлэлтээ батлуулжээ.