Эрнст Неизвестный

Эрнст Неизвестный (орос. Эрнст Ио́сифович Неизве́стный, төрөхдөө — Э́рик; 1925 оны 4-р сарын 9-нд ЗХУ-ын Свердловск хотод төрж, 2016 оны 8-р сарын 9-нд АНУ-ын Нью-Йорк хотод нас барсан) — Зөвлөлтийн болон Америкийн алдартай уран барималч. ОХУ-ын Төрийн шагналтан (1995). Латвийн ШУА-ийн гишүүн. Зөвлөлтийн Эх орны дайнд оролцогч.

Намтар

Эрик Неизвестный Свердловск хотын 16-р сургуульд сурч байжээ. 1939-1942 онд тэрээр Бүх Холбоотын Хүүхдийн Урлагийн Тэмцээнд оролцож байсан. 1942 оноос Ленинградын Урлагийн дунд сургуульд суралцаж байжээ (1941-1944 онд сургууль болон түүний бүх ажилтнуудыг Самарканд руу нүүлгэн шилжүүлсэн).

1942 оны 8-р сард түүнийг Улаан армид татсан. Энэ үеэр тэрээр Эрик гэдэг нэрээ Эрнст болгон өөрчилжээ. Түүнийг Туркестаны 1-р пулемётын цэргийн сургуульд сурагчаар илгээжээ. 1943 оны 10-р сард сургуулиа төгсөхөд нь бага дэслэгч Эрнст Неизвестныйг Украины 4-р фронтын армид илгээжээ. 1944 оны 3-р сарын 14-нд тэрээр салааны командлагчаар томилогдов. Хожим нь дивизийн бүрэлдэхүүнд тэрээр Будапешт руу довтлох зэрэг Украины 2, 3-р фронтуудад олон тооны байлдааны ажиллагаанд оролцжээ. Аугаа их эх орны дайны төгсгөлд буюу 1945 оны 4-р сарын 22-нд Австри улсад тэрээр хүнд шархаджээ.

Дайны дараа тэрээр Свердловскийн явган цэргийн сургуульд хэсэг хугацаанд зургийн хичээл заажээ. 1946-1947 онд Рига дахь Зөвлөлт Латвийн Урлагийн академид, дараа нь 1947-1954 онд В.И.Суриковын нэрэмжит Москвагийн Урлагийн дээд сургуульд суралцаж, Москвагийн Улсын Их Сургуулийн философийн тэнхимд сонсогч байжээ. 1955 онд Эрнст Неизвестный ЗХУ-ын Уран бүтээлчдийн холбооны Москва дахь салбарын уран барималчдын хэсгийн гишүүн болсон.

1962 онд Зөвлөлтийн удирдагч Никита Хрущёвтой зөрчилдсөний дараа Неизвестныйг Зөвлөлтийн Уран бүтээлчдийн холбооноос хөөж, студийг нь хаасан байна. Үүний дараа нь тэрээр үйлдвэрт, цутгах үйлдвэрийн ажилтан, өрлөгчин хийж байжээ. Хуурамч нэрээр тэрээр албан ёсны уран бүтээлчдэд тусалж байсан гэдэг.

1973 оны 6-р сарын 17-нд Неизвестный Израил руу цагаачлах өргөдөл гаргажээ. Гурван жил зөвшөөрөл хүлээсний эцэст 1976 оны 3-р сарын 10-нд дараа уран барималч ЗХУ-аас гарч, Швейцарийн Цюрих хотоор дамжин АНУ руу цагаачилжээ. 1977 оноос хойш Эрнст Неизвестный Нью-Йорк хотод амьдарч, Колумбын их сургуульд ажиллаж байжээ.

1996 онд тэрээр Оросын Ерөнхийлөгч Борис Ельциний соёлын асуудал эрхэлсэн зөвлөхөөр ажиллаж байв.

Э.Неизвестный 80 насныхаа ойг Орост өргөн тэмдэглэсэн. Амьдралынхаа сүүлийн жилүүдэд тэрээр хүнд өвчнөөр шаналж, тархины мэс засалд орсон.

Эрнст Неизвестный 2016 оны 8-р сарын 9-нд Нью-Йорк хотод 91 насандаа таалал төгсжээ.