Монгол Улсын Үндэсний Аюулгүй Байдлын Зөвлөл

Монгол Улсын Үндэсний аюулгүй байдлын Зөвлөл нь үндэсний аюулгүй байдлыг хангах төрийн нэгдмэл бодлого боловсруулах үйл ажиллагаа болон түүнийг хэрэгжүүлэх явдлыг уялдуулан зохицуулах, энэхүү зохицуулалт нь хэрхэн хангагдаж байгаад хяналт тавих төрийн зөвлөлдөх байгууллага юм.

МУ-ын Үндэсний аюулгүй байдлын зөвлөл анх 1992 онд байгуулагджээ.

Зөвлөл 3 гишүүнээс бүрдэнэ. Зөвлөлийн тэргүүн нь Монгол Улсын Ерөнхийлөгч, гишүүд нь Монгол Улсын Их Хурлын Дарга, Монгол Улсын Ерөнхий сайд нар байна. Мөн зөвлөлийн үндсэн чиг үүрэгт хамаарах асуудлаар судалгаа хийх, үнэлэлт, дүгнэлт гаргах, шийдвэрийн үндэслэлийг боловсруулах, биелэлтэд хяналт тавих ажлыг зохион байгуулж, Зөвлөлийн гишүүд бүрэн эрх, чиг үүргээ хэрэгжүүлэхэд нь тусалж, тэднийг үндэсний аюулгүй байдлын талаарх судалгаа, мэдээллээр хангах дотоод ажлыг эрхлэх Нарийн Бичгийн Даргатай байна. Зөвлөлийн нарийн бичгийн даргыг Монгол Улсын Ерөнхийлөгч томилдог.

ҮАБЗ-ийн одоогийн гишүүд, нарийн бичгийн дарга

• Тэрүүн - Цахиагийн Элбэгдорж
• Гишүүн - Дамдины Дэмбэрэл
• Гишүүн - Сүхбаатарын Батболд
• Нарийн бичгийн дарга Цагаандарийн Энхтүвшин

ҮАБЗ-ийн Нарийн Бичгийн Дарга нар

• Равдангийн Батаа (1992-1993 он)
• Жаргалсайханы Энхсайхан (1993-1996 он)
• Чойсүрэнгийн Баатар (1996-1997 он)
• Равдангийн Болд (1997-2003 он)
• Дүгэржавын Готов (2003-2006 он)
• Паламын Сүндэв (2006-2008 он)
• Маньбадрахын Ганболд (2008-2009 он)
• Цагаандарийн Энхтүвшин (2009 оноос)

Гадаад холбоос

Албан ёсны сайт