Сезар Балдаччини
Сезар Балдаччини (франц. César Baldaccini, 1921 оны 1-р сарын 1-нд Францын Марсель хотод төрсөн - 1998 оны 12-р сарын 6-нд Парист нас барсан) - Францын алдарт уран барималч. Сезар 1960-аад онд хаягдал төмрөөр хийсэн бүтээлүүдээрээ алдартай болсон бөгөөд сүйрсэн автомашины үлдэгдэлээр хийсэн барималаараа дэлхий даяар хүлээн зөвшөөрөгдсөн байна. Барималч өөрийн нэрийг уран бүтээлч нууц нэр болгон ашигласан. Францын киноны Сезар шагналыг түүний нэрэмжит болгож, алтадсан шагналыг тэр бүтээсэн байна.
Уран бүтээлийнхаа эхэн үед (1953 оноос хойш) Сезар Балдаччини гагнуурын машин ашиглан холбосон төмрөөр баримал бүтээдэг байжээ. Эдгээр бүтээлүүдэд Пабло Пикассо, Жермен Ричиер нарын нөлөө мэдрэгддэг. Сезарын барималууд нь янз бүрийн хэлбэр, бүтэцтэй байдаг бөгөөд тэрээр хаягдал төмрийн шинж чанарыг далдлаагүй, харин эсрэгээрээ идэвхтэй ашигладаг байв.
1965 онд тэрээр эрхий хурууны томруулсан хуулбар (1.85 метр өндөр) болох алдарт Pouce-ээ галерейд болсон үзэсгэлэнд толилуулжээ. 1988 оны Сөүлийн Олимпийн наадмын үеэр Сезар 6 м өндөртэй хүрлээр цутгасан энэ баримлыг толилуулжээ. Дараа нь зургаан метрийн хоёр хүрэл хурууг цутгаж, нэгийг нь 1984 онд Парисын Ла Дефенс дүүрэгт хөшөө болгон суурилуулж, 2007 онд дуудлага худалдаагаар 1,219,000 еврогоор зарсан бол нөгөө нь зураачийн төрөлх хот Марсель хотод байрладаг байна.