Павел Пясецкий

Павел Яковлевич Пясецкий (1843 оны 11 дүгээр сарын 7-нд Оросын Эзэнт улсын Орёл хотод төрж, 1919 онд Петербург хотод нас барсан) - Оросын эмч, аялагч, зураач, зохиолч, төрийн албаны зөвлөх.

Намтар

1855 онд Орёл хотын гимназид орж суралцаад 1861 төгсөөд Москвагийн Эзэн хааны Их сургуулийн Анагаах ухааны ангид элсэн суралцсан.

Бага наснаасаа тэрбээр зурах дуртай болсон ажээ. Суралцах хугацаандаа Пясецкий анатоми, гистологи, шүүх эмнэлэг, эх барих, арьсны өвчний талаар олон зуун зураг зурсан нь сүүлд сургалтын хэрэглэгдэхүүн болж байсан.

1872 онд Павел Пясецкий Тэнгисийн цэргийн флотод цэргийн эмчээр элсэхээр шийдэж, Москвагаас Санкт-Петербург руу нүүжээ. Тэрбээр газар зүй, угсаатны зүй, гадаад хэлийг судалж эхэлсэн.

1874 онд Оросын Цэргийн яам, Сангийн яам, Гадаад хэргийн яам хамтран Баруун Сибирээс Зүүн Өмнөд Хятад хүртэлх хамгийн дөт худалдааны замыг судлах экспедицийг тоноглох талаар зөвшилцөлд хүрчээ. Уг экспедицийг хурандаа Ю.А.Сосновский удирдах болж, бүрэлдэхүүнд Павел Пясецкийг эмч, зураачаар авч явсан байна. Түүнээс гадна цэргийн газар зүйч-топограф 3.Л.Матусовский, гэрэл зурагчин А.Э.Боярский, хятад хэлний орчуулагч И.С.Андриевский болон гурван сибирийн казак цэрэг — А.Павлов, И.Степанов, Н.Смокотнин, хятад Сюй нар оржээ. Энэхүү Хятад руу хийсэн аялал нь Монголоор дайрч явсан байна. Экспедицийн төгсгөлд Павел Пясецкий Сибирь, Монгол, Дорнод, Дундад, Баруун хойд Хятадын оршин суугчдын соёл, амьдрал, ертөнцийг үзэх үзэлд зориулсан "Хятадаар хийсэн аялал" номоо бичжээ. Энэхүү номыг англи, франц хэл рүү орчуулсан байна.

П.Пясецкий зурсан зургуудаа эмхэтгэж "Хятадын дунд хэсгээс Баруун Сибирь хүртэл" анхны панорама зургаа хэвлүүлсэн. Нэмж дурдахад тэрбээр эрдэс судлал, ургамал судлал, амьтан судлал, угсаатны зүйн цуглуулга цуглуулж, "Хятадаар хийсэн аялал" ном бичсэн нь Оросын эзэнт гүрний Газар зүйн нийгэмлэгийн том Алтан медалиар шагнагджээ.