Европол
Европол (англи. Europol) бол Хааг хотод төвтэй Европын Холбооны цагдаагийн алба юм. Тус албаны гол зорилго нь олон улсын зохион байгуулалттай гэмт хэрэгтэй тэмцэх үндэсний албадын ажлыг уялдуулан зохицуулах бөгөөд үндэсний цагдаагийн албад хоорондын мэдээллийн солилцоог сайжруулахад чиглэж байна. Терроризм, хууль бус зэвсгийн наймаа, хар тамхины наймаа, хүний наймаа, хүүхдийн порнограф, мөнгө угаах гэмт хэрэгтэй тэмцэх зэрэг нь Европолын үйл ажиллагааны гол чиглэл юм.
2020 оны 2-р сараас эхлэн Европол нь Европын Холбооны гишүүн 27 орны цагдаагийн албаны ажлыг уялдуулан зохицуулж байна.
Одоогийн байдлаар Европолд 630 орчим ажилтан ажиллаж байгаагийн 120 орчим нь Европын Холбооны гишүүн орнууд өөрийн үндэсний хууль сахиулах байгууллагуудын төлөөлөгчөөр Европолд томилогдон ажиллаж байгаа Европолын холбох ажилтан (англи. Europol Liaison Officer, ELO) нар юм.