Мария Колесникова

Мария Колесникова (белор. Марыя Аляксандраўна Калеснікава; 1982 оны 4-р сарын 24-нд Минск хотод төрсөн) - Беларусийн мэргэжлийн хөгжимчин, улс төрийн идэвхтэн, улс төрийн хоригдол юм. 2020 оны Беларусийн ерөнхийлөгчийн сонгуульд Виктор Бабарикогийн сонгуулийн штабын дарга байв. Светлана Тихановскаягийн хамтарсан штабын төлөөлөгч, улс төрийн хямралыг даван туулах үйл явцыг зохион байгуулах зохицуулах зөвлөлийн тэргүүлэгчдийн гишүүн бөгөөд "Хамтдаа" (бел. Партыя «Разам») намын дарга.

Түүнийг 2020 оны 9-р сарын 7-ны өдөр аюулгүй байдлын албаныхан барьцаалж, 9-р сарын 8-ны өглөө эрт Украины хил рүү хүчээр авч явсан. Тэд Колесниковаг албадан гадагш гаргахыг оролдсон боловч Украинтай хиллэдэг хяналтын постын өмнө паспортоо урж, пост руу авч явж байсан машинаас цонхоор гарч ирсэн байна. Үүний дараа тэр Беларусийн нутаг дэвсгэрт буцаж ирээд тэр даруй баривчлагджээ.

Урьдчилан хорих төвд нэг жил хоригдож байсан түүнийг 2021 оны 9-р сарын 6-ны өдөр Минск мужийн шүүхийн шийдвэрээр “Үндсэн хууль бус аргаар төрийн эрх мэдлийг булаан авах, хэт даврагч бүлэглэл үүсгэн удирдан зохион байгуулах зорилгоор хуйвалдаан үйлдсэн” хэрэгт буруутгажээ. Түүнчлэн төрийн эрх мэдлийг булаан авах, Беларусийн үндэсний аюулгүй байдалд хохирол учруулах бусад үйлдлүүд, тэр дундаа гадаад улс, гадаад, олон улсын байгууллагад чиглэсэн, хэвлэл мэдээллийн хэрэгсэл, интернет ашиглан үйлдсэн гэж үзжээ. Хэргийн Шүүх хурал хаалттай явагдаж, яллагдагчдад материалтай танилцах боломж олгоогүй, өмгөөлөгч нар мэдээлэл задруулахгүй байх гэрээ байгуулсан. Колесникова 11 жилийн хорих ялыг ерөнхий дэглэмтэй хорих ангид эдлэхээр болжээ.

Европын холбооны найман орон, АНУ, Канад, Их Британи Колесниковаг улс төрийн хоригдол, ухамсрын хоригдол гэж үзэж, оноосон ялыг буруушааж, нэн даруй суллахыг шаардсан байна. Шүүхийн шийдвэр гарсны дараа эдгээр улсын удирдагчид Лукашенкогийн дэглэмийн эсрэг хориг арга хэмжээг чангатгааад байна.

Намтар

Мария Колесникова 1982 оны 4-р сарын 24-нд Минск хотод инженерийн гэр бүлд төрсөн. Түүний эцэг эхийн хөгжимд маш их дурласан нь тэдний хүүхдүүдийн боловсрол, ирээдүйн мэргэжлийг сонгоход нөлөөлсөн. Тэрээр хөгжмийн сургуульд сурч, дараа нь Беларусийн Улсын хөгжмийн академийг лимбчин, хөгжмийн удирдаач мэргэжлээр төгссөн.

17 настайгаасаа эхлэн Колесникова Минск хотын дунд сургуульд лимбэ заадаг байв. Тэрээр Дуурийн театр, Беларусь улсын Үндэсний эрдмийн концертын найрал хөгжим, Бүгд Найрамдах Беларусь улсын Ерөнхийлөгчийн найрал хөгжимд тоглож байсан. Тэрээр Итали, Литва, Польшид олон удаа аялан тоглолт хийсэн байна. 2007 онд тэрээр Герман руу явж Штутгарт дахь Хөгжмийн дээд сургуульд элсэн орж эртний болон орчин үеийн хөгжим гэсэн хоёр факультетад нэгэн зэрэг суралцсан байна.