Сергей Есенин

Сергей Есенин. 1922 он

Сергей Александрович Есенин (1895 оны 9-р сарын 21 -нд Оросын эзэн улсын Рязань аймгийн Константиново тосгонд төрсөн- 1925 оны 12-р сарын 28-нд ЗХУ-ын Ленинград хотод нас барсан)-оросын алдарт яруу найрагч, оросын яруу найргийн "Мөнгөн зууны" томоохон төлөөлөгч гэж үздэг.

Түүний уран бүтээлийн үе үеийн шүлгүүдэд социал демократ үзэл санаа, хувьсгал ба эх орон, хөдөө орон нутаг, байгаль, хайр дурлал, аз жаргалын эрэл хайгуулын дүр төрхийг тусгасан байдаг.

Натар[засварлах | кодоор засварлах]

Сергей Есенин 1895 оны 10-р сарын 3-нд Рязань мужийн Рязань дүүргийн Кузьминская волостын Константиново тосгонд тариачны гэр бүлд төржээ. Эцэг - Александр Никитич Есенин (1873-1931), эх-Татьяна Федоровна Титова (1875-1955). Эмэгтэй дүү - Екатерина (1905-1977), Александра (1911-1981), эх нэгтэй дүү - Александр Иванович Разгуляев (1902-1961).

1904 онд Есенин төрсөн Константиновск тосгоны бага сургуульд сурч, 1909 онд 2-р зэргийн сүмийн сургуульд сурчээ.

Сургуулиа төгсөөд 1912 оны 8-р сард Есенин Москва руу нүүж, худалдаачин Крыловын махны дэлгүүрт ажиллаж эхэлжээ. Энэ үед Есенин дотуур байранд амьдардаг байжээ. Дараа нь Есенин И.Д.Сытиний хэвлэх үйлдвэрт ажилд оржээ.

1913 онд А.Л.Шанявскийн нэрэмжит Москва хотын Ардын их сургуулийн түүх, гүн ухааны факультетэд эчнээгээр элсэн орсон. Тэрээр хэвлэх үйлдвэрт ажиллаж, "Суриковын утга зохиол, хөгжмийн дугуйлан"-гийн яруу найрагчидтай нөхөрлөж байсан байна.

1914 онд Есениний анхны "Хус мод" шүлэг "Мирок" сэтгүүлд "Аристон" нууц нэрээр хэвлэгдсэн байна. 1915 онд Есенин Москвагаас Петроград руу нүүж тэндээ 3-р сарын 9-нд Александр Блоктой танилцсан ажээ.

Яруу найрагчийн залуу нас Дэлхийн нэгдүгээр дайны үетэй таарсан юм. 1916 оны 1-р сард Есенинийг цэрэгт татаж Царское село-гийн /Хааны тосгон/ 143-р цэргийн эмнэлгийн галт тэргэнд томилогдсон байна. Яруу найрагч Николай Клюевын хамт тэрээр Царское Село дахь хатан хаан Александра Феодоровна болон түүний 4 охин - Ольга, Татьяна, Мария, Анастасия нарын өмнө шүлэг уншдаг байжээ. Тэрээр 1916 онд цэргийн эмнэлгийн галт тэрэгэнд II Николай тэргүүтэй эзэн хааны гэр бүлийн хамт Крымд очиж байжээ.

1919 оны эхээр тэрээр "большевик" намд элсэх өргөдөл гаргасан боловч хүлээж аваагүй байна. 1920-иод оны эхээр яруу найрагчийн «Трерядница», «Исповедь хулигана» (1921), «Стихи скандалиста» (1923), «Москва кабацкая» (1924), поэма «Пугачёв» зэрэг шүлгүүд хэвлэгдсэн байна.

Есениний тухай хурц шүүмжлэлүүд сонин хэвлэлд гарч, түүнийг согтуу, завхайрал, зодоон болон бусад нийгмийн эсрэг үйлдлээр буруутгаж эхлэв. Есенинийг танхайн хэргээр хэд хэдэн эрүүгийн хэрэг үүсгэж байжээ. Тэрээр архинд гүн орсон тул найз нөхөд нь эмлүүлэхээр оролдож байсан болов ч тэр өөрөө эмнэлэгээс зугтаж байжээ.

1925 оны 12-р сарын 24-нд Есенин Ленинградад очоод "Англеттер" зочид буудлын 5-р өрөөнд оржээ. 4 хонгийн дараа 1925 оны 12-р сарын 28-нд Есенинийг найз сэигүүлч Г.Ф.Устинов эхнэрийнхээ хамт түүнийг өрөөндөө амиа хорлож /дүүжилж/ нас барсан байхыг олжээ.

Эх сурвалж: https://ru.wikipedia.org/wiki/%D0%95%D1%81%D0%B5%D0%BD%D0%B8%D0%BD,_%D0%A1%D0%B5%D1%80%D0%B3%D0%B5%D0%B9_%D0%90%D0%BB%D0%B5%D0%BA%D1%81%D0%B0%D0%BD%D0%B4%D1%80%D0%BE%D0%B2%D0%B8%D1%87