Японы Үндэсний парламентын номын сан

Японы Үндэсний парламентын номын сангийн төв байр.

Японы Үндэсний парламентын номын сан (япон. 国立国会図書館 дуудлага-Кокурицу Коккай Тосёкан, англи. National Diet Library of Japan) —Японы Үндэсний цорын ганц номын сан. Японы парламентын гишүүдэд зориулж анх 1948 онд байгуулагдсан, дэлхийн хамгийн том номын сангуудын нэг юм. Зорилго боломжоороо АНУ-ын Конгрессын номын сантай дүйцэж очно. Үндэсний парламентын номын сан Токио, Киото хотуудад үндсэн хэсгүүд байрладаг байна.

Түүх

Японы үндэсний парламентын номын сан нь 1890 онд Парламент бий болж Пэрүүдийн танхимын номын сан, Төлөөлөгчдийн танхимын номын сан байгуулагдаж байсан байна. Харин энэ нь анх 1872 онд Боловсролын яамны дэргэд байгуулагдсан Эзэн хааны номын санг байгуулж байжээ.

Үндэсний парламентын номын сангийн албан ёсны нээлт сүүлд 1948 оны 6-р сард 100 мянган боть номтой анх Уулзалтын ордонд (дайны үед дэлбэрсэн хуучин Акасака ордон) болжээ. Түүний анхны захирал нь улс төрч Токужиро Канамори, дэд захирал нь философич Масаказу Накай нар байв. 1949 онд Үндэсний парламентын номын санг Үндэсний номын сантай (хуучнаар Эзэн хааны номын сан) нэгтгэж, Японы цорын ганц Үндэсний номын сан болжээ. Өмнө нь Үеногийн үндэсний номын санд хадгалагдаж байсан 1 сая боть тус номын сангийн фондоор аривжуулжээ.

1961 онд тус номын сан Японы Парламентын байрнаас холгүй Нагататё гэдэг газар шилжүүлэн нүүлгэсэн байна.

Үйл ажиллагаа

Японы хуулийн дагуу Японы хэвлэн нийтлэгчид хэвлэгдсэн бүх бүтээгдэхүүнээ Үндэсний парламентын номын санд илгээх үүрэгтэй. Энэ нөхцөл нь Япон судлалын талаарх дэлхийн шилдэг цуглуулгуудыг байнга бүрдүүлэх боломжийг олгодог. Улсын хэвлэлийн газрууд 30 ширхэг хэвлэсэн бүтээгдэхүүнээ, хувийн хэвлэлийн газрууд нэг ширхэг өгөх ёстой бөгөөд номын сангаас зах зээлийн үнийн 50 хувийг төлдөг байна. Номын сангийн ажилтнуудаас жил бүр хэвлүүлдэг “Нихон Зенкоку Шоши” (日本全国書誌, «Японы улсын номзүй») номзүйн цуглуулгад бүх ном, тогтмол хэвлэлийг оруулдаг байна. Энэ байгууллага нь АНУ, Их Британийн төв номын сангуудтай Засгийн газрын хэвлэлүүдийг тогтмол солилцдог ажээ. Ном зүйг зохион байгуулахад соронзон хальс, 1971 оноос хойш мэдээллийн технологийг ашиглаж иржээ.

Японы Үндэсний парламентын номын сан 1 төвтэй болон 27 мэргэжлийн чиглэлийн салбаруудтай ажээ.

Цахимжуулалт

Сүүлийн жилүүдэд тус номын сангийн англи, япон хэл дээрх цахим хуудас идэвхтэй хөгжин ажиллаж байна. Энэхүү цахим хуудсанд номын сангийн ерөнхий каталог, орчин үеийн 60 000 ном, эртний 37 000 ном, Японы парламентын хурлын тэмдэглэл зэрэг баримт бичгүүдийг шилжүүлэн оруулдаг болсон байна.