Алексей Орлов

Алексей Орлов (орос. Алексе́й Мара́тович Орло́в, 1961 оны 10-р сарын 9-нд Зөвлөлт Халимагийн Элстэй хотод төрсөн) —Халимагийн бөгөөд оросын төрийн болон улс төрийн зүтгэлтэн. ОХУ-ын Сенатч —2019 оноос Бүгд Найрамдах Халимаг Улсын гүйцэтгэх засаглалын төлөөлөгч. ОХУ-ын Холбооны Зөвлөлийн Олон улсын харилцааны хорооны бүрэлдэхүүнд орсон.

ОХУ-ын Бүгд Найрамдах Халимаг Улсын тэргүүнээр 2010 оны 10-р сарын 24-өөс 2019 оны 3-р сарын 20 хүртэл (2014 оны 5-р сарын 6-аас 9-р сарын 23-ны хооронд үүрэг гүйцэтгэгч) ажилласан.

Орос-Украины дайны үеэр Украины нутаг дэвсгэрийн бүрэн бүтэн байдлыг зөрчихийг дэмжиж байгаагаас үүдэн Европын холбоо, АНУ, Их Британи болон бусад хэд хэдэн улсын хувийн олон улсын хоригт орсон.

Намтар

1961 оны 10-р сарын 9-нд Элст хотод Марат, Светлана Орлов нарын гэр бүлд төрсөн. Халимаг үндэстэн.
1978-1984 онд ЗХУ-ын ГХЯ-ны Москвагийн Олон улсын харилцааны дээд сургуулийг төгссөн. Мэргэжил: Олон улсын харилцааны мэргэжилтэн. Англи, Индонези, Малай хэлээр ярьдаг.
1984-1985 он - Сельхозпродекспорт нийгэмлэгийн ахлах байцаагч (Москва).
1986-1989 - Москвагийн "Агрегат" туршилтын үйлдвэрийн сантехникч (Москва).
1989-1991 онд ЗХУ-ын Гадаад хэргийн яамны Үйлдвэрчний эвлэлийн үйлчилгээний төвийн хэлтсийн дарга.
1991-1994 онд Зөвлөлт-Югославын хамтарсан "Сов-Юг" компанийн ерөнхий захирал.
1994-1995 онд - "Пойск" ХК-ийн ерөнхий захирлын орлогч.
1995 он - Орос-Италийн хамтарсан "MAG" ХК-ийн ерөнхий захирал .
1995-2003 онд Бүгд Найрамдах Халимаг Улсын Засгийн газрын орлогч дарга, Бүгд Найрамдах Халимаг Улсаас ОХУ-ын Ерөнхийлөгчийн дэргэдэх Байнгын төлөөлөгч.
2003—2010 — Бүгд Найрамдах Халимаг Улсын Засгийн газрын нэгдүгээр орлогч дарга, Бүгд Найрамдах Халимаг Улсаас ОХУ-ын Ерөнхийлөгчийн дэргэд суугаа Байнгын төлөөлөгч.
2010-2019 онд Бүгд Найрамдах Халимаг Улсын тэргүүнээр ажилласан.
2019 оны 10-р сараас ОХУ-ын Холбооны Зөвлөлийн гишүүн, Бүгд Найрамдах Халимаг Улсын гүйцэтгэх засаглалын төлөөлөгч.