Бямбын Жигжид

Бямбын Жигжид (Архангай аймгийн Жаргалант суманд 1946 онд төрсөн) -Монгол Улсын Төрийн зүтгэлтэн, Дэд бүтцийн сайд, Монгол Улсын Аж үйлдвэрийн гавьяат ажилтан, Хөдөлмөрийн баатар.

Намтар

Тэрээр 10 хүүхэдтэй малчин эцэг Янживын Бямба, эх Пүрэвийн Галсан нарын хоёр дахь хүүхэд болж төрсөн.

Жаргалант сумын бага анги төгсөж, Эрдэнэмандалын 10 жилийн дунд сургуулийг онц дүнтэй дүүргэсэн.

1964-1969 онд ЗХУ-д Уралын Политехникийн дээд сургуулийн Үйлдвэрийн дулаан хангамж мэргэжлээр төгссөн байна.

1969 онд Ээлжийн диспетчерээс ажлын гараагаа эхэлсэн.

1970 онд Улаанбаатар хотын Дулааны шугам сүлжээний газрын ерөнхий инженер,

1984 онд НАААҮЯ-ны орлогч сайдаар 1984 оноос томилогдсон.

1990 оны 9-р сард Ерөнхий сайд Д.Бямбасүрэнгийн Засгийн газарт Түлш эрчим хүчний яамны сайдаар томилогдсон.

1992 онд П.Жасрайн Засгийн газрын Эрчим хүч, геологи, уул уурхайн яамны сайд,

1996 онд Засгийн газрын хэрэгжүүлэгч агентлаг НААҮ-ийн газрын даргаар томилогдсон.

2000 оноос Н.Энхбаярын Засгийн газарт Дэд бүтцийн яамны сайд, Монгол-Туркийн, Монгол Улс-ОХУ-ын, Монгол-БНХАУ-ын Засгийн газар хоорондын комиссын даргаар ажиллаж, салбарын сайд хүртэл дэвшин, дэд бүтцийн салбарт 50 гаруй жилийн хөдөлмөрөө зориулжээ.

2010 оноос “Монголын, Азийн супер сүлжээ” нийгэмлигийн ерөнхийлөгч, Эрчим хүчний барилга угсралт, засварчдын холбооны тэргүүн.

Бүтээл

Тэрбээр “Мянганы зам”, “Эрчим хүчний нэгдсэн систем”, “Монголын холбоо, мэдээллийг хөгжүүлэх дунд хугацааны стратеги”, “100 мянган нарны гэрэл” зэрэг богино, дунд, урт хугацааны томоохон төсөл, хөтөлбөр санаачлан, удирдан хэрэгжүүлсэн.

Үүний зэрэгцээ Тайшир, Дөргөний усан цахилгаан станц байгуулах, баруун бүсийг эрчим хүчний төвлөрсөн системд холбох, малчид, алслагдсан газарт ажиллаж амьдарч байгаа иргэдийг сэргээгдэх эрчим хүчээр хангах, төв суурин газруудыг авто замаар холбох ажлыг амжилттай удирдан эдийн засгийн хүндрэл бэрхшээлтэй үед үндэсний авто замын сүлжээг өргөжүүлэх ажлыг санаачлан эхлүүлсэн байна.

Мөн 21 аймгийг холбосон холбоо мэдээллийн хурдны сүлжээ бий болгож, орон нутагт телевиз, ФМ радиогийн олон суваг, үүрэн холбооны сүлжээ барьж байгуулах ажлыг зохион байгуулсан, Нийслэлийн цэвэр усны найдвартай эх үүсвэр бий болгох, Дундговь, Архангай, Говь-Алтай, Ховд, Өвөрхангай зэрэг аймагт төвлөрсөн усан хангамж, цэвэр, бохир усны шугам сүлжээ, цэвэрлэх байгууламж байгуулах ажлыг үр дүнтэй хэрэгжүүлж, Монгол Улсын хөгжил цэцэглэлтэд жинтэй хувь нэмэр оруулсан тул Хөдөлмөрийн баатар цол хүртээв.