Сергей Лавров

Чөлөөт нэвтэрхий толь — Википедиагаас
Jump to navigation Jump to search
r

Сергей Викторович Лавров (1950 оны 3 дугаар сарын 21-нд ЗХУ-ын Москвад төрсөн) — Оросын улс төрийн зүтгэлтэн, дипломат, 2004 оны 3 дугаар сарын 9-ний өдрөөс хойш Оросын Холбооны Улсын Гадаад хэргийн сайд. 2020 онд Оросын хөдөлмөрийн баатар хүртсэн.

Оросын 2021 оны парламентын сонгуулийн "Нэгдсэн Орос" намын Холбооны нэрсийн жагсаалыг тэргүүлэгчдийн нэг.

Боловсрол[засварлах | edit source]

Сергей Лавров Москвагийн хязгаарын Ногинск хотын №2 дунд сургуульд сурч байгаад сүүлд Москва хотын англи хэлний гүнзгийрүүлсэн сургалттай №607 дунд сургуулийг 1966 онд мөнгөн медальтай төгссөн байна.

1972 онд ЗХУ-ын ГХЯ-ны дэргэдэх Москвагийн Олон улсын харилцааны дээд сургуулийн Дорно чиглэлийн тэнхимд сурч төгссөн. Англи, франц, синхал хэлтэй.

Ажилласан байдал[засварлах | edit source]

  • 1972-1976 онд ЗХУ-аас Шри Ланка Улсад суугаа ЭСЯ-нд дадлагжигч, атташе.
  • 1976-1981 онд ЗХУ-ын Гадаад хэргийн яамны Олон улсын байгууллагын газарт гурав, хоёрдугаар нарийн бичгийн дарга,
  • 1981-1988 онд ЗХУ-аас НҮБ-ын дэргэд суугаа Байнгын төлөөлөгчийн газарт нэгдүгээр нарийн бичгийн дарга, зөвлөх, ахлах зөвлөх,
  • 1988-1990 онд ЗХУ-ын Гадаад хэргийн яамны Олон улсын эдийн засгийн байгууллагын газрын орлогч дарга,
  • 1990-1992 онд ОХУ-ын Гадаад хэргийн яамны Олон улсын байгууллагын газрын захирал,
  • 1992-1994 онд ОХУ-ын Гадаад хэргийн орлогч сайд, /А.Козыревыг сайд байх үед/
  • 1994-2004 онд ОХУ-аас НҮБ-ын дэргэд суугаа Байнгын төлөөлөгч,
  • 2004 оноос ОХУ-ын Гадаад хэргийн сайд, ОХУ-ын Аюулгүйн Зөвлөлийн байнгын гишүүн.

Шагнал[засварлах | edit source]

Оросын "Эх орны гавьяаны" I, II, III, IV зэргийн бүх одон болон бусад одон медалиар шагнуулсан болно.

Гадаад орнуудын олон одон медалиар шагнуулсан.

1992 онд ОХУ-ын Онц бөгөөд Бүрэн эрхт Элчин сайд цол хүртсэн.

Бүтээл[засварлах | edit source]

"Өнгөрсөн ирээдүй хоёрын дунд. Өөрчлөгдөж буй дэлхийд Оросын дипломат ажиллагаа" /Между прошлым и будущим. Российская дипломатия в меняющемся мире/ (2011), "Бид- эелдэг хүмүүс! Гадаад бодлогын тухай бодол" /Мы - вежливые люди! Размышления о внешней политике/ (2017) зэрэг өгүүлэл бичсэн.

Чөлөөт цагаараа гитар хөгжим тоглож, шүлэг бичдэг.

Гэр бүл[засварлах | edit source]

Эхнэр, охинтой.

Эхнэр Мария Александровна Лаврова, хэл зүйч буюу орос хэл, уран зохиолын багш, НҮБ-ын дэргэд суугаа Байнгын төлөөлөгчийн газрын номын санд ажилласан.

Охин Екатерина Сергеевна Винокурова, 1982 онд Нью-Йорк хотод төрсөн. 2005 онд Колумбын Их сургуулийг улс төр судлал мэргэжлээр төгссөн.

Хүргэн Александр Винокуровтай 2008 онд охин Екатерина нь гэрлэсэн. А.Винокуров Оросын "Альфа групп", "Марафон групп"-ын топ менежер.

2010 онд Леонид гэж зээ хүүтэй болсон.

Лавровын эцэг нь Калантаров гэж овогтой Тбилиси хотын армен үндэстэн гэдэг. Гэвч ОХУ-ын Гадаад хэргийн яамны албан ёсны цахим хуудас дээр Лавров — орос үндэстэн гэсэн байдаг. Эх нь ЗХУ-ын Гадаад хуладааны яамны ажилтан байсан гэдэг.