Ардын Их Хурал
1960 онд баталсан БНМАУ-ын III дахь Үндсэн хуульд тус улсад гагцхүү Ардын Их Хурал нь хууль тогтоох эрхтэй, төрийн эрх барих дээд байгууллага байх, Ардын Их Хурлын чуулганы чөлөө цагт Ардын Их Хурлын Тэргүүлэгчид төрийн эрх барих дээд байгууллага байхаар заасан. Ардын Их Хурал (АИХ) бүх шатны Ардын Депутатуудын Хурлын системийг толгойлон улс орныг төрийн зүгээс удирдах бүрэн эрхийг хэрэгжүүлж, үйл ажиллагааг нь хянаж удирдан, Үндсэн хууль, бусад хуулиудыг батлах эрх эдэлж байв. АИХ-ын Тэргүүлэгчдийн бүрэлдэхүүнд АИХ-ын Тэргүүлэгчдийн дарга, орлогч дарга нар, нарийн бичгийн дарга, тэргүүлэгч гишүүд орж байв. АИХ-ын Тэргүүлэгчид АИХ-д ажлаа хариуцан тайлагнах ба түүний эрх хэмжээнд хамаардаг зарим чухал асуудлыг чуулганы чөлөөт цагт шийдвэрлэж байв. Үүний нэг жишээ бол АИХ-ын Тэргүүлэгчдийн зарлигаар хууль батлаад түүнийгээ дараа нь АИХ-ын чуулганд оруулж баталгаажуулдаг байсан нь АИХ-ын хууль тогтоох үйл ажиллагааг хэлбэрдэхэд хүргэж байв. Түүнчлэн АИХ-д Мандатын комиссоос гадна төлөвлөгөө төсвийн, хуулийн төсөл боловсруулах ба үндэсний асуудлын, хөдөө аж ахуйн, аж үйлдвэрийн, соёл, гэгээрэл, эрүүлийг хамгаалахын болон залуучуудын асуудал эрхлэх зэрэг 10 гаруй байнгын комисс ажиллаж байв.
БНМАУ-ын Ардын Их Хурлын 12 дахь удаагийн сонгуулийн II хуралдаан 1992 оны 1 дүгээр сарын 13-ны өдөр Монгол Улсын шинэ Үндсэн хуулийг баталснаар түүхэн үүргээ гүйцэтгэж дуусаад үйл ажиллагаагаа зогсоосон байна.
БНМАУ-ын АИХ-ын дарга нар[засварлах | кодоор засварлах]
- Гончигийн Бумцэнд (1951 оны 7-р сарын 6-1953 оны 9-р сарын 23-ны өдөр)
- Сүхбаатарын Янжмаа (1953 оны 9-р сарын 23- 1954 оны 7-р сарын 7-ны өдөр) (үүрэг гүйцэтгэгч)
- Жамсрангийн Самбуу (1954 оны 7-р сарын 7- 1972 оны 5-р сарын 20-ны өдөр)
- Цагаанламын Дүгэрсүрэн (1972 оны 5-р сарын 20 - 1972 оны 6-р сарын 29-ний өдөр) (үүрэг гүйцэтгэгч)
- Сономын Лувсан (1972 оны 6-р сарын 29- 1974 оны 6-р сарын 11-ний өдөр) (үүрэг гүйцэтгэгч)
- Юмжаагийн Цэдэнбал (1974 оны 6-р сарын 11 - 1984 оны 8-р сарын 23-ний өдөр)
- Нямын Жагварал (1984 оны 8-р сарын 23 - 1984 оны 12-р сарын 12-ны өдөр) (үүрэг гүйцэтгэгч)
- Жамбын Батмөнх (1984 оны 12-р сарын 12 - 1990 оны 3-р сарын 21-ний өдөр)
- Пунсалмаагийн Очирбат (1990 оны 3-р сарын 21 - 1990 оны 9-р сарын 3-ны өдөр)