Александра Чудина

Александра Чудина Хөнгөн атлетик Төлөөлдөг улс: ЗХУ Хувийн мэдээлэл Бүтэн нэр Александра Георгиевна Чудина Төрсөн огноо 1923 оны 11 сарын 6 (1923-11-06) Төрсөн газар Тула муж, Крамская Нас барсан огноо 1990 оны 10 сарын 28 (66 насалсан)

Медалиуд Зуны олимп Мөнгө Хельсинки 1952 Уртын харайлт Мөнгө Хельсинки 1952 Жад шидэлт Хүрэл Хельсинки 1952 Өндрийн харайлт Европын АШТ Алт Берн 1954 Таван төрөлт Мөнгө Берн 1954 Уртын харайлт

Александра Георгиевна Чудина (1923 оны 11 сарын 6-нд Тула муж, одоогийн Куркинский тойрог дахь Крамская тосгонд төрж, 1990 оны 10 сарын 28-нд нас барсан) нь Зөвлөлт Холбоот Улсын хөнгөн атлетикч, волейболчин юм. Москвагийн Динамо нийгэмлэгт харьяалагддаг байв.

Хөнгөн атлетик

Тэрээр ЗХУ-ыг төлөөлөн Финландын Хельсинкид зохиогдсон 1952 оны зуны олимпод оролцон, жад шидэлт, уртын харайлтын төрлөөр мөнгө, өндрийн харайлтын төрлөөр хүрэл медаль хүртжээ.

Түүнчлэн 1954 оны 5 сарын 22-нд Киев хотод 1.73 метр өндөр дээгүүр амжилттай харайж, Их Британийн Шейла Лервиллийн тогтоосон өмнөх дээд амжилт болох 1.72 метрийг эвдэж, эмэгтэйчүүдийн өндрийн харайлтын дэлхийн дээд амжилтын эзэн болжээ. Түүний дээд амжилтыг 1956 оны 5 сарын 5-нд Бельфаст хотод Их Британийн Тельма Хопкинс 1.74 метр болгон ахиулжээ.

Волейбол

Тэрээр волейболын спортоор ЗХУ-ын шигшээ багийн бүрэлдэхүүнд багтаж, 1952, 1956, 1960 онд дэлхийн аварга, 1949, 1950, 1951, 1958 онд Европын аварга цол хүртэж байснаас гадна Европын АШТ-д 1955 онд Чехословакийн багт ялагдан мөнгөн медаль хүртэж байжээ.