Майер Принштайн

Майер Принштайн Хөнгөн атлетик Төлөөлдөг улс: Америкийн Нэгдсэн Улс Хувийн мэдээлэл Бүтэн нэр Майер Принштайн Төрсөн огноо 1878 оны 12 сарын 22 Төрсөн газар Щучин, Польш Нас барсан огноо 1925 оны 3 сарын 10 Нас барсан газар Нью-Йорк

Медалиуд Зуны олимп Алт Парис 1900 Гурвын харайлт Мөнгө Парис 1900 Уртын харайлт Алт Сент-Луйс 1904 Гурвын харайлт Алт Сент-Луйс 1904 Уртын харайлт

Майер Принштайн (Myer буюу Meyer Prinstein, анх Mejer Prinsztejn, 1878 оны 12 сарын 22– 1925 оны 3 сарын 10) нь Америкийн хөнгөн атлетикч, Ирланд-Америкчуудын Хөнгөн Атлетикийн Клубийн тамирчин бөгөөд уртын харайлтын дэлхийн дээд амжилтыг эзэмшиж байсан, олимпын 3 алтан медальтай.

Бага нас

Принштайн 1878 онд Польшийн Щучинд төржээ. Түүний эцэг эх Якоб, Жулиа Принштайн (хуучин Янкел Принштайн, Жудес Рубинштайн) нар Польш-Оросын еврей үндэстнүүд байсан бөгөөд тэд 1883 онд Нью-Йорк руу цагаачилжээ. Удалгүй Сиракюз руу нүүсэн бөгөөд Майер тэнд өсч торнисон байна. Тэд 5 охин, 4 хүүтэй байсан аж. Аав Якоб нь ногоо, талх нарийн боовны мухлаг ажиллуулдаг байв. Майер 9 хүүхдийн гурав дахь нь байлаа.

Тэр Сиракюз Их Сургуулийн хөнгөн атлетикийн багийн ахлагч байсан бөгөөд их сургуулиа хуулийн ухааны бакалаврын зэрэгтэй төгсчээ.

Дэлхийн дээд амжилт

Принштайн 1898 оны 6 сарын 11-нд Нью-Йоркт уртын харайлтаар 7.235 м (23' 8⅞")-ийн амжилт үзүүлж, дэлхийн дээд амжилт тогтоов. Түүний энэ амжилтыг эхлээд Ирландын Виллам Ньюбөрн мөн оны 6 сарын 18-нд, дараа нь Элвин Крэнцлайн 1899 оны 5 сарын 26-нд ахиулсан байна. 1900 оны 4 сарын 28-нд Принштайн Филадельфи хотноо 7.50 м (24’ 7¼”) харайж дэлхийн шинэ дээд амжилт тогтожээ. Түүний энэ амжилт 4 сар тэссэн бөгөөд 1900 оны 8 сарын 29-нд Ирландын Петер О'Коннор эвдсэн юм.

Хожмын амьдрал

1906 оноос хойш Принштайн Нью-Йорк хотын Күйнс дүүргийн Ямайкад амьдарч, хуулийн салбарт ажиллаж байсан бөгөөд хожим бизнес эрхэлж байв. Тэр 1925 оны 3 сарын 10-нд Нью-Йорк хотын Маунт Синай эмнэлэгт зүрхний өвчний улмаас нас нөгчжээ.

Принштайн 1982 онд Олон Улсын Еврейчүүдийн Спортын Алдрын Танхимд багтсан билээ.

Эшлэл

 Commons: Myer Prinstein – Викимедиа зураг, бичлэг, дууны сан

• Greenberg, Stan (1987). Olympic Games: The Records. London: Guinness Books. ISBN 0-85112-896-3.
• Kieran, John (1977). The Story of the Olympic Games; 776 B.C. to 1976. Philadelphia and New York: J.B. Lippincott Company. ISBN 0-397-01168-7.

Цахим холбоос

• Щучины Еврей Нийгэмлэг
• Sports-reference дахь профиль

[[Ангилал:Гурвын харайлтын олимпын аварга]