Родриго Эрнандес
.jpg)
Родриго Эрнандес Касканте ( испан. Rodrigo Hernández Cascante; 1996 оны 6-р сарын 22-нд Мадрид хотод төрсөн), Родри (испан. Rodri) нэрээрээ алдаршсан Испаний хөлбөмбөгчин бөгөөд Манчестер Сити болон Испанийн шигшээ багт хагас хамгаалагчаар тоглодог тамирчин. УЕФА Аваргуудын лиг, Европын аварга шалгаруулах тэмцээний аварга. Родри France Football сэтгүүлийн 2024 оны Алтан бөмбөг буюу "Ballon d'Or" шагнал хүртсэн.
Намтар
[засварлах | кодоор засварлах]Родриго Эрнандес Касканте 1996 оны 6-р сарын 22-нд Испаний нийслэл Мадрид хотод төрсөн. Тэрээр 2007 онд 11 настайдаа Райо Мажадахонда багаас Мадридын Атлетико клубын залуучуудын багт элссэн. 2013 онд биеийн хүч дутмаг байсан тул багаас гарч Вильярреал клубтай гэрээ байгуулсан байна.
2018 оны 5-р сарын 24-нд Родри эргээд Атлетико Мадрид клубтай 5 жилийн гэрээ байгуулсан. Мөн оныхоо 8-р сарын 25-нд Райо Вальеканогийн эсрэг хийсэн тоглолтонд тэрээр шинэ багийнхаа төлөө анхны тоглолтоо хийсэн. 11-р сарын 10-нд Атлетик Бильбаогийн эсрэг хийсэн тоглолтод Атлетико Мадридын төлөөх анхны гоолоо оруулсан. Клубын бүрэлдэхүүнд тэрээр Европын супер цомын эзэн болсон.
2019 оны 7-р сарын 3-нд Родриг Английн Премьер лигийн Манчестер Сити клуб хөлбөмбөгчний гэрээнд заасан нөхөн төлбөр болох 70 сая еврогоор худалдан авч, 5 жилийн хугацаатай гэрээ байгуулав. 8-р сарын 4-нд Английн супер цомын төлөө Ливерпүүл багтай хийсэн тоглолтонд тоглогч үндсэн багийнхаа төлөө анхны тоглолтоо хийж, цомын эзэн болсон. 8-р сарын 10-нд Вест Хэм Юнайтедтай хийсэн тоглолтонд тэрээр Английн Премьер лигт анхны тоглолтоо хийсэн юм. 9-р сарын 14-нд Норвич Ситигийн эсрэг хийсэн тоглолтонд тоглогч Манчестер Ситигийн төлөөх анхны гоолоо оруулсан байна. 2023 онд тэрээр Аваргуудын лигийн финалд Интер Миланы эсрэг хийсэн цорын ганц гоолыг оруулснаар Манчестер Ситиг анх удаагаа энэ тэмцээний ялагч болоход хувь нэмрээ оруулсан байна.