Пьер Огюст Ренуар

Пьер Огюст Ренуар (Франц: Pierre-Auguste Renoir; 1841 оны 2-р сарын 25-нд Лимож хотод төрсөн–1919 оны 12-р сарын 3 -нд нас барсан)- Францын зураач, уран барималч бөгөөд уран зурагт импрессионист чиглэлийг хөгжүүлэхэд чухал үүрэг гүйцэтгэсэн гол төлөөлөгчдийн нэг юм.

Намтар

Бага нас

Тэрээр 1841 оны 2 сарын 25нд Францын шаазан эдлэлээрээ алдартай Лимож хотод жирийн ажилчны гэр бүлд 7 хүүхдийн зургаа дахь хүүхэд нь болон мэндэлжээ. Түүний эцэг оёдолчин Леонар, Огюстыг 3 настай байхад амьдрадаа дээшлүүлэхээр гэр бүлээ дагуулан Парис хотруу нүүж Луврын музейн ойролцоо амьдрах болсон байна. Леонарын хүүхдүүд өөрсдийн хүчээр амьдралаа аргацаахаас аргагүй байсан тул Огюст 13 настайгаасаа шаазангийн үйлдвэрт ажиллаж шаазангийн чимэглэл зурдаг байв. Гэвч уг чимэглэлийг автомат машинаар зурах болсон тул ажлаасаа халагдсан байна. Тэр Луврын музейд очиж алдарт зураачдын бүтээлийг судлахын зэрэгцээ сэнсний гоёлын зураг, хананд өлгөдөг чимэглэлийн эд зүйлсийн зураг зурах зэргээр өл залгаж өдөр хоногийг өнгөрөөж байлаа.

Залуу нас

Пьер Ренуар 1862 онд Парис хотод Чарльс Глэйрийн удирдлаган дор урлагийн хичээлд сууж, Альфред Сислей, Фредерик Базиль, Клод Моне нартай танилцана. Тэр үедээ будаг авах ч мөнгөгүй явдаг байв. 1864 оноос маш нарийн сонгон шалгаруулалтыг давж, жил бүр зохиогддог Парисын Салон-д бүтээлээ тавьж эхэлсэн ч алдар нэр тийм амар ирсэнгүй. 1860-аад оны сүүлээр найз Клод Монетой хамт сүүдрийн өнгө хар эсвэл бор биш, харин эргэн тойрны тусгал өнгө гэдгийг нээж хамтран бүтээл туурвиж байсан. 1865 онд зураач найз Жюль Ле Кёрийн гэрт танилцсан Лиза хэмээх бүсгүйтэй үерхэх болж хэд хэдэн зургийнхаа модел болгожээ. 7 жил үерхсэний эцэст Лиза түүнийг орхиж өөр хүнтэй гэрлэсэн байна.

Ядуу зүдүү амьдралтай байсан ч зураач 1874—1882 онуудад гол бүтээлүүдээ туурвисан: "Грандс Бульварс" (1875), "Променад" (1875), "Мулен де ла Галеттийн бөмбөг" (1876), "Нүцгэн" (1876), "Нарны гэрэлд нүцгэн" (1876), "Савлуур" (1876), "Анхны гарц" (1876/1877), "Өндөр өвсөн дээрх зам" (1877).

Ренуар аажмаар импрессионист үзэсгэлэнд оролцохоо больсон. Тэрээр алдар нэр, үнэтэй захиалгад хүрэх замыг санал болгодог Парисын салонд илүү их татагдсан. 1879 онд тэрээр "Жүжигчин Жанна Самарийн хөрөг" (1878) болон "Хүүхдүүдтэй хамт хатагтай Шарпентьегийн хөрөг" (1878) бүтэн дүрс бүхий зургуудаа салонд ирүүлж, бүх нийтийн хүлээн зөвшөөрөлт, улмаар санхүүгийн хувьд бие даасан байдалд хүрсэн. Тэрээр шинэ зургуудаа үргэлжлүүлэн зурсаар байсан бөгөөд ялангуяа алдарт "Клишигийн бульвар" (1880), "Завиар аялах үдэшлэгийн үдийн хоол" (1881), "Дэнж дээр" (1881) зэрэг зургуудаа зуржээ.