Пүи

Чөлөөт нэвтэрхий толь — Википедиагаас
— «Хэвт Ёс» гээд холбогдов —
Харайх: Удирдах, Хайлт
Хэвт ёс
Чин улсын хаан
Aisin-Gioro Puyi 01.jpg
1934 оны Пүи
Хаанчлал 1908.12.02–1912.02.12
(4 жил, 12-р хаан)
Төрсөн огноо 1906 оны 2 сарын 7 (1906-02-07)
Төрсөн газар Чин улс, Бээжин
Өнгөрсөн огноо 1967 оны 10 сарын 17
(61 насалсан)
Өнгөрсөн газар БНХАУ, Бээжин
Оршуулсан Бабаошаний оршуулгийн
газар, дараа нь Чингийн
баруун бунханд
зөөгдсөн
Өмнөх Бадаргуулт төр
Удаах
Хатан 5 эхнэр
Хүүхэд хүүхэдгүй
Овог Aйсингиоро
Эцэг Чунь ван Зайфөн
Эх Юлань
Оны цол манж: Гэхүнгэ ёсо
монгол: Хэвт ёс
хятад: Шюаньтун

Пүи (19061967; 61 насалсан) — 1908-1912 онд заларсан манж Чин улсын төгсгөлийн арван хоёрдугаар Хэвт ёс, Хятад орны түүхэн дэх сүүлчийн эзэн хаан байв. 1932 оноос Японы хүүхэлдэй улс болох Манж-гог тэргүүлж 1934-1945 онд Кандэ хаан гэгдсэн. 1945-1959 онд Зөвлөлт, Хятадын шоронд хоригдоод суллагдаж БНХАУ-ын улсын хурлын гишүүн болжээ.

Балчир хаан[засварлах | edit source]

Айсингиоро Пүи 1906 онд Бадаргуулт төр хааны дүү Чунь чин ван Зайфөнгийн ахмад хүү болон төржээ. Өвөг нь Чунь чин ван Ишюань бөгөөд элэнц нь Төр гэрэлт хаан юм. Пүигийн эх нь манжийн гувалгия овогт Юлань (1884–1921) байв.

Бадаргуулт төр хаан, Цыши хатан эх нар өөд болсны дараа 3 настай Пүиг шинэ хаан өргөмжилсөн бөгөөд оны цолыг монголоор Хэвт ёс, манжаар Гэхүнгэ ёсо, хятадаар Шюаньтун - Xuantong гэсэн. Төрийн хэргийг хааны эцэг Чунь ван шийдэж байв. Пүи ордонд Вэн Чаован гэдэг асрагчтай байсан бөгөөд төрсөн эхтэйгээ долоо жилийн турш уулзаагүй.

Цагаагчин гахай жилийн хувьсгалаар Хятад орон Чингийн хаанд захирагдахгүй болж, Юань Шикайн боловсруулсан хааныг татан буулгах нөхцөлд хааныг төлөөлөн бэлэвсэн их хатан Лунъюй 1912 оны 2 сарын 12-нд гарын үсэг зуржээ.

Бор хот[засварлах | edit source]

1922 он. 16 настай

Пүи 18 нас буюу 1924 он хүртэл Бээжин дэх хааны ордон Бор хотод амьдарсан.

1917 оны 7 сард Жан Шюнь гэх жанжин Пүиг хаан ширээнд дахин залсан ч Дуань Чируйд ялагдсанаар хэдхэн хоног болоод цуцлагдсан. 1919 онд Регинальд Жонстон хаанд англи хэл заах болсон бөгөөд хааныг манж хэл мэддэггүй, харин хятадаар ярьдгыг дурссан.

1922 онд дөрвөн бэлэвсэн хатан Пүид зураг үзүүлснээр Ваньрун, Вэньшюй хоёр хатан буулгав.

Жонстон 1924 онд Мингийн хааны удмын Жү Юйшюнийг Пүитэй уулзуулсан нь хоёр улсын хаан ургийн уулзсан анхны тохиол байв. Мөн онд Фөн Юйшян гэх жанжин Пүиг Бор хотоос хөөжээ.

Тяньжинь[засварлах | edit source]

Тяньжин дахь ордон

Эцэг Чунь вангийн өргөөнд хэдэн өдрийг өнгөрөөгөөд Пүигийн гэр бүл Тяньжинь дахь Японы мэдлийн газар луу нүүжээ. Пүи Чэнь Баочэнь, Жөн Шяошюй, Луо Жэньюй нартай хаант ёсыг сэргээхийг зөвлөлдөж байсан бөгөөд 1931 онд Японы цэргийн сайд Жиро Минамид захидал бичсэн.

Манж-го[засварлах | edit source]

Манж-гогийн хаан

Пүи 1932 оны 3 сарын 1-нээс Японы хүүхэлдэй улс байсан Манж-го (манж улс)-г удирдах болж, оны цолыг Датун хэмээсэн бол 1934 онд хаан болж Кандэ гэгдэв. Кандэ хааны ордон Чанчүньд байсан (одоо музей) бөгөөд Пүи манж, япон, өрнийн хийцтэй цэргийн хувцас өмсдөг байлаа.

Пүигийн дүү Пүже Японы эзэн хаан Хирохитогийн үеэл Хиро Сагатай гэрлэсэн ба Манж-гогийн ор залгах ханхүүгээр нэр заагджээ. 1935-1945 онд Квантунгийн армийн Ясүнори Ёшиока Пүид туслаж, мөн хянаж хамт байдаг байсан.

Дайны дараа[засварлах | edit source]

Дэлхийн хоёрдугаар дайны төгсгөл үе 1945 оны 8 сарын 16-нд Пүи Зөвлөлтийн улаан армид олзлогдож эхлээд Чита, дараа нь Хабаровск хүргэгдсэн. Хятадад коммунист хүчин ялж БНХАУ байгуулагдсаны дараа Зөвлөлт Пүиг Хятадад шилжүүлсэн.

Хятадад ирээд Ляонин мужийн Фүшүнь дэх шоронд 10 жил хоригдсоны эцэст 1959 онд Мао Зэдунгийн өршөөлөөр суллагджээ. Дараа нь Бээжин дэх ургамлын хүрээлэнд ажиллаж, улсын номын санд бичгийн хэргийн ажилтан болсон. 1962 онд Жоу Энлайн тохируулснаар Ли Шүшянь сувилагчтай гэрлэжээ. 1964 оноос 1967 онд нас барах хүртлээ Хятад улсын хурлын гишүүн гэсэн өндөр албан тушаал эрхэлсэн.

1966 оны Соёлын хувьсгалын улаан хамгаалагчид ордныг нь дайран сүйтгэж Пүигийн бие муудаж, зүрхний өвчнөөр 1967 оны 10 сарын 17-нд 61 насандаа таалал төгчээ. Цогцсыг чандарлаж Бабаошань хувьсгалын оршуулгын газарт аваачсан ба 1995 онд бэлэвсэн эхнэр нь хувиасаа мөнгө гаргаж Чингийн баруун бунханд авчирчээ.

Гэр бүл[засварлах | edit source]

3 настай Пүи эцэг ван, дүүгийн хамт
  • Эцэг — Чунь ван Зайфөн — айсингиоро овогт
  • Эх — Юулань — гувалгия овогт

Дүү[засварлах | edit source]

Пүи Ваньрун хоёр Тяньжиньд

3 эрэгтэй, 7 эмэгтэй дүүтэй. Үүнд:

  • Пүже (1907–1994) — эх нэг эрэгтэй дүү, 87 насалсан
  • Пүчи (1915–1918) — 3 насандаа өөд болсон
  • Пүрэн (1918–2015) — 97 насалсан
  • Юньхэ (1911–2001) — 90 насалсан гэх мэт

Эхнэр[засварлах | edit source]

  • Ваньрун (1906–1946) — гобула овогт дагуур, 1922 онд гэрлэсэн, Шяокөминь их хатан
  • Вэньшюй (1909–1953) — эрдэт овогт монгол, 1922 онд гэрлэсэн, 1931 онд салсан, Шюй хатан
  • Тан Юйлин (1920–1942) — татара овогт манж, 1937 онд гэрлэсэн, Шян татвар
  • Ли Юйчинь (1928–2001) — хятад, 1943 онд гэрлэсэн, 1957 онд салсан, Лю татвар
  • Ли Шүшянь (1928–2001) — хятад, 1962 онд гэрлэсэн, эхнэр

Урлагт дүрслэгдсэн нь[засварлах | edit source]

Викимедиа зургийн сан:
«Пүи»
Өмнөх
Бадаргуулт төр
Чин улсын хаан
1908–1912 он
Дараах
Өмнөх
Манж-гогийн хаан
1934–1945 он
Дараах