Винс Картер

Винсент Ламар Картер (Англи: Vincent Lamar Carter, 1977 оны нэгдүгээр сарын 26-нд Флорида мужийн Дейтона Бич хотод төрсөн) — Америкийн мэргэжлийн сагсан бөмбөгчин бөгөөд Үндэсний сагсан бөмбөгийн холбооны Мемфис Гриззлис багийн тоглогч юм. Тэрээр жижиг довтлогч болон шидэгч-хамгаалагчийн байрлалд тоглодог. 1998 оны драфтаар Голден Стэйт Уорриорз багт сонгогдсон ч Торонто Рэпторс тэр дор нь эгнээндээ элсүүлж, улмаар Нью-Жерси Нетс болон Орландо Мэжик багуудад дамжин тогложээ. Сагсан бөмбөгчин Трэйси Макгрэди бол түүний үеэл дүү.

Товчхон[засварлах | кодоор засварлах]

Картерийн сод амжилтуудыг товчхон дурдахад 2000 онд Америкийн шигшээ багт багтан Сиднейн олимпт түрүүлсэн бол 2001 оны нэгдүгээр сарын 17-нд Нью-Йорк Никс багтай хийсэн НБА-гийн тоглолтонд замналын турш дахь "20000 дахь оноогоо" авсан юм.[1] 20000 давуулан оноо авсан өнөө цагийн 30 шилдэг тоглогчдын нэг Картер анх 1998 оны драфтаар №5 дахь сонголтоор НБА-д орж ирж байв. 1999 онд Торонто Рэпторс багт 50 тоглолтонд 18.3 оноо дунджилсан нь НБА-гийн шилдэг залуу тоглогчийн шагнал авахад хангалттай байсан юм. Тэр 2000 онд улирлын турш 25.7 оноо дунджилсан бөгөөд цагирагт довтлох тэмцээнд түрүүлж, холимог оддын тоглолтонд гарамгай дамжуулалтаараа ялгарч байлаа. Түүнчлэн 2001 онд 82 тоглолтын турш 27.6 оноо дунджилсан нь дээд үзүүлэлт нь байлаа.

Нью-Жерси Нетс багт алба хаасан таван жилийн хугацаанд Картерийн хувьд тоглолтын идэвхи жаахан суларсан мэт түүний статистик үзүүлэлтээс харагдах мэт авч тун амжилттай тоглож байсан билээ. Энэ багт Майами Хит багийн эсрэг 2005 онд тоглохдоо 51 оноо авсан нь түүний шилдэг үзүүлэлт төдийгүй, гучин насны босго давсан жилдээ буюу 2007 онд Финикс Санз багтай тоглосон тоглолтон дээр 47 оноо, 18 самбар, 12 дамжуулалтаар трипл-дабл хийсэн нь гайхам байсан юм.

2011 оны арванхоёрдугаар сарын 10-нд бүтэн улирал Финикс Санз багтай өнгөрүүлсэн гэрээгээ өндөрлөж Даллас Маверикс багт ирсэн юм. 2012 оны арваннэгдүгээр сарын 25-нд Лейкерс (89:115) багтай тоглосон Далласын тоглолтонд Картер НБА-гийн 1000 дахь тоглолтоо хийж байв.[2]

2014 оны долоодугаар сарын 12-нд Мемфис Гриззлистэй гурван жилийн гэрээг 12,2 сая доллараар байгуулав.[3][4]

Тоглох ур чадвар[засварлах | кодоор засварлах]

Картерийн тоглолтын хэв маягийн тухайд дундаж нуруутай, бадриун чийрэг биетэй тул хурд хүчний тэсрэлттэй, үсрэлт сайтай, замналын туршид 1500 гаруй холын зайн шидэлтийг амжилттай болгосон гэхээр шидэлт тун сайн гэдгийг харуулж байна. Түүнийг "Винсенити", "Хагас хүн" гэж хочлох нь олонтаа.

Эшлэл[засварлах | кодоор засварлах]

  1. Картер набрал своё 20-тысячное очко в матче с «Нью-Йорком»
  2. Винс Картер провел свой 1000-й матч
  3. "Grizzlies sign Vince Carter to multi-year contract". NBA.com. July 12, 2014. Retrieved July 12, 2014.
  4. "Grizzlies sign Vince Carter to multiyear contract". NBA.com. July 12, 2014. Retrieved July 12, 2014.

Холбоос[засварлах | кодоор засварлах]