Агваансамдангийн Сүхбат

Агваансамдангийн Сүхбат Сайн бөх

Төрсөн өдөр	1971 оны 6 сарын 30 (1971-06-30)
Төрсөн газар	Монгол улсын Төв аймгийн Сэргэлэн сум
Алдар цол
Бөхийн цол	Дархан аварга
Дууддаг нутаг	Төв аймгийн Сэргэлэн сум
Цол ахисан он жил
Дархан аварга цол олгов	2014
Даян аварга	2007
Далай аварга	2004
Улсын аварга	2001
Улсын арслан	2000
Улсын заан	1997
Улсын начин	1993
Улсын наадмын барилдааны амжилт
Түрүүлсэн	3 (2000, 2001, 2004)
Шөвгөрсөн	11 (1993, 1997, 1998, 1999, 2000, 2001, 2002, 2003, 2004, 2005, 2006)
Цагаан сарын барилдааны амжилт
Түрүүлсэн	2 (1999, 2001)
Үзүүрлэсэн	1 (2003)
2014-7-11-ний байдлаар мэдээлэв.

Агваансамдангийн Сүхбат (1971-06-30 ) нь Төв аймгийн Сэргэлэн сумын харьяат, үндэсний бөхийн дархан аварга, сонирхогчдын сүмо бөхийн дэлхийн хошой аварга, Монгол Улсын гавьяат тамирчин цолтой бөх, мөн 2016 оны УИХ-ын сонгуульд МАН-аас нэр дэвшин сонгогдон ажиллаж байв.

Тэрээр Монголын үндэсний бөхийн барилдаадн "6 залуу заан" хэмээх нэгэн үеийг эзэлсэн, үзэгчдийг шуугиулж барилдаж байсан 6 бөхийн нэг бөгөөд эдгээр заануудаасаа анх удаа Улсын наадамд түрүүлж Монгол улсын Арслан болж байсан.

2001 оны наадамд 10 даван түрүүлсэн ба ингэхдээ тухайн үеийн 12 удаа Төрийн баяр наадамд түрүүлсэн Б.Бат-Эрдэнэ аваргаар давж аварга болж байв. 2001 оны наадамд 9-ийн даваанд барилдахдаа тухайн үеийн Монгол улсын заан Г.Өсөхбаярт барилдааны дараа тийрүүлэн өшиглүүлж наадмыг 2 цаг хэртэй удаашруулж байв. Энэ нь улсын наадамд хоёр бөх хоорондоо барилдаад танхайн үйлдэл гаргасан анхны тохиолдол байв.

2006 оны наадамд бөхийн спортоос зодог тайлж буйгаа зарлаж мөн л наадамд шуугиан тарьж байв.

2014 оны наадамд Дархан аварга цолтойгоор барилдан Г.Өсөхбаяр аваргатай "Зүүний магнай" булаацалдан улмаар маргаан үүсэж Зүүний магнайд А.Сүхбат гарснаар эрэмбээ батлан протоколд тэмдэглүүлэн үлджээ. Тухайн наадмын 3-ын даваанд А.Сүхбат нь Г.Өсөхбаярыг амласан явдал нь Дархан аварга Дархан аварга цолтноо амласан анхны тохиолдол болж байв. Тус барилдаанд тэрээр барилдалгүй тахимаа тайлж өгсөн.

2015 оны наадамд дахин барилдана гэдгээ хэвлэл мэдээллээр зарласан боловч түүнд Зүүний магнайг өгөхгүй гэх эсэргүүцэл Бөхийн холбоо, Наадмын бөхийн хороонд байсан тул барилдаагүй болно.

Уг маргаан нь Монгол бөхийн дүрэм нь бөөрөнхий, тойруу утгаараа яаж ч тайлбарлаж болох гэдгийг харуулсан явдал болсон юм.

2022 оны Ардын хувьсгалын 100 жилийн ойгоор мөн л Зүүний магнайд гарах гэсэн боловч Г.Өсөхбаяр түрүүлэн гарч тэрээр зүлэг ногоон дэвжээнд хүндэтгэл үзүүлэн барилдалгүй өнжив.

Түүний бас нэгэн сонирхолтой амжилт нь тэрээр нэг зэрэг олон эхнэртэй бөгөөд хүүхэнд нугасгүй чанар нь юм.

Амжилт

Үндэсний бөх

• 1993 онд 6 давж улсын начин цол, "Өсөх идэр" чимэг,
• 1997 онд 7 давж улсын заан цол,
• 1998 онд 6 давж үлэмж бадрах чимэг,
• 1999 онд 5 давж саруул сайжрах чимэг,
• 2000 онд 9 давж түрүүлэн улсын арслан цол,
• 2001 онд 10 давж түрүүлэн улсын аварга цол,
• 2002 онд 7 давж хуйрнин шуугигч чимэг,
• 2003 онд 7 давж саруул сайжрах чимэг,
• 2004 онд 9 давж түрүүлэн далай аварга болов
• 2005 онд 6 давж үнэн зоригт чимэг,
• 2006 онд 6 давж цогт гарамгай чимэг тус тус хүртэж, шөвгөрснийхөө дараа зодог тайлснаа зарласан.
• 2007 онд Монгол Улсын Ерөнхийлөгч Намбарын Энхбаярын зарлигаар Даян аварга цол олгосон.
• 2014 оны долоодугаар сарын 7-нд Үндэсний их баяр наадмын тухай хуульд өөрчлөлт орсонтой холбогдон Ерөнхийлөгч Цахиагийн Элбэгдоржийн зарлигаар дархан аварга цол хүртээсэн.

Сонирхогчдын сүмо бөх

Дэлхийн аварга шалгаруулах тэмцээнд 2 удаа түрүүлсэн.

Чөлөөт бөх

1997 оны Ази тивийн аварга шалгаруулах тэмцээнд мөнгөн медаль хүртсэн. Олон улсын хэмжээний мастер цолтой.